阿爺話未來一段時間，唔退市亦唔入市，看官們信唔信都好，大媽睇準3,500點入，4,000點食胡，在五百點區間內玩回力球，卻是樂此不疲。昨滬綜指即市撻到落3,558點，尾段狂抽236點，一口氣由跌轉升，收3,794點，升45點，不過，香港股市就無咁好彩喇。自上周二，人行突然讓人民幣出現一次過的貶值，港股威過半日，之後無段好睇，恒指由24,924點高位，輾轉殺到落尋日貼底收23,167點，再跌307點。

純做本地屋苑商場的置富，較北上發展的領展更為市場受落。（資料圖片）

要知投資最怕睇唔清楚前景，人行口講貶值只屬一次過，不過，區區3%貶值為乜，市場有唔同演繹角度，如果為應對萎縮中的對外貿易，相比起今年新興市場貨幣在美國加息在即下，無不跌到七個一皮，兌美元閒閒哋貶值一至兩成，人民幣修正的幅度，就明顯唔多足夠，最怕今年十月確認入到IMF的特別特款權貨幣（SDR），人行反口，放軟手腳加入貨幣貶值戰，是外資最唔願見到的發展。

外資離棄中港股

本身內地企業盈利增長放緩情況未見底，A股估值唔平，外資輸價兼輸匯水就無謂，況且今年歐洲放水無上限，美國踏入復甦坦途，歐美股市大把世界撈，跨國基金對中國投資意欲本來就唔高，整個暴力救市加埋貨幣貶值風險，就更加不屑一顧，攞錢走算鬼數。

尋日見A股收市後，港股又一輪沽盤湧現，推到恒指創八個月收市新低，成交額反而升至917億元，反映對魚缸死心的人愈來愈多，在情緒勝過理智下，七月股災低位22,836點要唔要再試試，睇嚟都係五五波。

因為要進軍內地，又早被內地一些公司搶先註冊，為避免「撞名」，領匯屈就要改名領展（00823），新名腳頭好唔好就未知，但個價落到一個月新低卻係事實，跌0.5%收42.55元。話時話，近排人民幣貶值，債商無不視為中國開始向世界輸出通縮的安排。事實上，上星期人仔貶值消息一出，十年期美國債息一度跌至2.08厘，同七月初高位2.46厘比較，輾轉回落超過一成五。

美債被視為無風險利率指標，息率回落，刺激唔少穩定回報投資，好似REITs回升，同期置富（00778）由七月股災低位7.1元升返上7.75元（期間最高見過8.38元），再睇同期越房（00405）、陽房（00435）及冠君（02778）唔係隻隻有置富彈咁多，但大致都有類似走勢，領展好明顯在自顧自「獨弱」。

在下七月底講過，唔多睇好在內地商廈租值有見頂味道，內地收租股折讓擴大之際，用一個唔算平的價錢，向瑞房（00272）收購上海企業天地番嚟收租。

領展北上唔睇好

況且，俗語有云猛虎不及地頭蟲，領展當日因為港府賤賣資產，有重估價值先咁威，今日出海同其他地產商單打獨鬥，仲有冇優勢，捧場客自己昅實劇情發展，二揀一，都係睇番齋做本地屋苑商場的置富。

大堆業績出籠，早排出過盈警的奶粉股合生元（01112），上半年業績倒退34.4%至2.05億元人民幣，唔派息，股價隊5.4%，收報13.22元，創五十二周低。市場上，比較估得淡的匯證預測全年賺4.11億，合生元算係僅僅做到估算的五成，不過就算達標，一五年PE都講緊17.2倍，即使股價由四月高位大跌六成八，擰住呢份業績，似乎短期要炒番上去都唔易。

查實近排乳業股得隻輝山（06863）不斷見大股東增持，股價可以逆流向上，其他可謂無隻精神，連雅士利（01230）簽意向書，同第二大股東法國達能將成檔內地嬰幼兒奶粉生意多美滋接手買下，股價連一浸都谷唔起，大致睇到基金對成個行業前景，睇得淡過白開水。