A股每個月都來一次笨豬跳，認真趕客！不過，昨日失守3,600點關後又迅即反彈，仲單日轉向倒升作結，睇怕又係國家隊做嘢！觸發反彈的其中一個原因，係盛傳人行好快會宣布降準，但老實講呢招若然有效，就唔會發展都要救市貶值的地步！

其實，目前A股所面對的，並不是流動性問題，而是投資者的信心問題。客觀而言，內地經濟增長持續放緩，多項穩增長措施已出台，但經濟仍未見大起色，一年已差不多過了八個月了，再加上A股大跌，股市融資功能停頓，再來個人民幣貶值，一來對刺激出口作用不大，卻觸發區內其他貨幣競相貶值，對外債甚高的中國企業而言，亦是百上加斤，匯率貶值預期令市場平添一項重大不明朗因素，加上區內人禍不絕，呢個咁糟糕的局面，唔係靠中央意志可以應付得到。在看清楚前路前，做旁觀者係最自保！

航空股先沽為敬

航空股走勢繼續彈完再散，昨日國航（00753）股價率先失守250日線。若果人民幣持續貶值的看法無錯，航空股實不宜持有。睇次季國航是三家中資航空股中股價最先見頂的一員，今次股價率先失守牛熊分界線，可能係預視板塊跌浪還在後頭，仍持有東航及南航的投資者，宜把握減持套現的機會。

繼續睇吓防守性股份，上個月大跌市，中信股份（00267）股價一度失守12元，上周曾反彈至15.28元，昨日收報14.62元，跌1.4%。

呢隻大型綜合企業股，除了大股東係阿爺之外，其他海外策略股東來頭亦唔小，但目前要先整理與母公司的資產，以及配合央企改革，總之長路慢慢，加上現價往績市盈率9倍，市帳率0.88倍，息率僅1厘多，估值唔見得吸引。如果下周一公布的業績無咩特別，呢啲價即使睇長線亦難令投資者動心，且看第三季尾的金魚缸Fall Sale有冇平貨執好過！