香港息口超低，加上股市走勢向下，價錢持續上升嘅「磚頭」自然成為市場追捧目標，深明此道嘅資深投資者廖偉麟近年就掃入唔少甲級商廈、商舖，以至車位，再以批發形式轉售或拆細出售畀其他投資者或用家，個別物業如匯八坊商場賺幅高近八成；另外，其短期新目標係一年內嘗試競投住宅地變身發展商，目前個人持有資產組合總值已高達30億元。

投資者廖偉麟現時個人資產投資組合總值達30億元，希望在五十歲時增加至100億元。

身兼紀惠集團副主席嘅廖偉麟同劉Sir講，十幾年前喺美國讀完經濟學後，原先想喺美國做銀行，但最終都係以月薪9,000元「高薪厚職」，喺○二年中返港協助家族生意，由低做起。

拆售項目賺錢高手

佢話自己嘅投資之道同紀惠好唔同，個人喜歡貨如輪轉嘅投資策略，鍾情一啲價格相宜、有分拆概念嘅大型商場或舖位。佢笑住話，「早喺小學時期已經有良好投資概念，十二歲個陣興高達模型，就一口氣喺一間模型店內以每盒20元購入40盒模型，搞到斷晒市，然後再將加工好嘅模型以每個300元賣比其他同學」。

佢又話，一直以「批發」形式去將把個人持有嘅物業分拆賣，「情況就如魚販把一條魚分開魚頭、魚身及魚尾等，唔同位置「有平有貴」，分拆後可以畀買唔起成條魚嘅用家或租戶入市「自己做業主」，同時亦留有水位讓下一個業主加租或轉售」。

過去數年佢已經拆售3個項目，包括尖沙咀銀座式商廈H8、彩虹匯八坊商場及牛池灣嘉峰臺商場，全部項目原則拆售，未有改動，其中匯八坊商場賺幅更近八成。

冀50歲擁百億資產

不過，零售業寒冬持續，廖偉麟早於本年初時已預計一、二線街舖租金會下跌三至四成，至今核心區的確已錄不少大幅減租個案，他預料，截至年底，舖租更會進一步下滑一成，拖累舖價，目前已準備摸底入市，主要目標依然係可以分拆嘅大型舖位。

對於個人未來目標，年僅三十八歲嘅佢話，自二十九歲起展開個人投資，當時本金僅1,000萬元，而目前個人持有資產投資組合總值已達30億元，希望喺五十歲嗰陣增加到100億元，而短期目標將會係一年內嘗試投地興建住宅，目標係2至4億元嘅地皮。