周末，IMF中國工作組組長Markus Rodlauer話，人民幣匯率三年內應該採取完全自由浮動，難得老外們見識過七月中國的暴力托市，轉頭來個粗放式匯率調整，殺到班人仔炒家一頸都係血，居然仲樂觀認為中國兩三年內，可以把計劃經濟指揮棒完全交到自由市場經濟主義手上，到底真係咁阿Q，定係擺出請君入甕姿態，看官們自己諗諗。

國際金價由一一年高位反覆回落，早前更創出五年低位。（資料圖片）

姑勿論點，早前IMF確認人民幣入唔入到SDR，如常在十月定案，執行可以拖九個月，去到明年第三季，都話變相畀貼士大家，如無意外，人民幣今年內入硬特別提款權，成為國際儲備貨幣之一，否則阿爺亦唔會等IMF首肯，匯率企到硬一硬，而唔理出口死得直一直都唔理。

意外反而是，此前唔少分析都把中國外貿萎縮，歸咎於於匯率過高，到北大人肯作出讓步畀人仔貶值，反而香港無人托的中資股，被插到開花，可見成個市唔單止充斥住為淡而淡的芬佬，佢哋仲相當難服侍。

賭場老雀話去賭場玩，個人運氣仲係其次，最緊要識得搵燈，專搵印堂發烏卒卒的黑仔對賭，經已成功咗一半。近年金融市場最光亮的「明燈」，非數沽神普爾遜（John Paulson）莫屬，沽神最有名係事件主導，例如企業分拆合併改革事件中，搵出差價圖利，但對賭宏觀經濟，表現認真麻麻哋。

回看一一年基金規模折腰，輸鑊金之後疊埋心水睇好黃金，結果，國際金價由當年高位1,800美元水平級級落，至今無段好睇，早排跌到落每安士1,072美元，創五年低。沽神上星期向美國SEC提交報告，之前七季死咬住唔放的黃金交易所買賣基金（ETF）SPDR Gold Trust，第二季終於開始出貨，沽掉一成，六月底持有單位減到923萬個。

港股成交繼續縮

睇番隻美國黃金ETF，因為美國加息預期升溫，七月撻到落103.43美元，上周五收報106.85美元，假如未清倉，沽神又要揩多五千幾萬美金。黑心啲講，黃金捧場客真係要求神拜佛沽神早日清倉，唔好繼續搭沉條船。

人民幣貶值一步到位，上周五匯價見穩定落嚟，可惜港股彈都彈唔起，最終收市跌27點報23,991點，主板成交縮再創「大時代」之後新低，得642億元，連恒期及國期成交都縮晒，成個市好似放緊暑假一樣。北大人暴力救市到出動貶值，全部在時機與成效方面，都徹底出乎班外資芬佬預期，睇唔通個市，最好就係坐住多啲現金，少做少錯。

中信系再炒重組

唔賭有蟻咬的魚缸友，借重組將成系中信落鑊，上周五中信大錳（01091）升28.2%，中信資源（01205）升15.8%，中信股份（00267）升6.5%，連大昌行（01828）都有3.2%進帳，只怕又係得三、兩日貨仔。經緯紡機（00350）獲國資委屬下中國恒天集團溢價8%全購，之前恒天經已收咗隻香港老牌紡織機械股，改埋名恒天立信（00641），會唔會搞到紡織資產大聯盟，不妨拭目以待。

因為投資物業公允值減少，主營收入賣東江水，兼營物業投資及百貨營運的粵海投資（00270），半年少賺10%至22.2億元，每股盈利35.53仙，派中期息10仙，比去年的8仙升25%。香港以統包總額買東江水，且年年用不到上限，公帑是否做到應洗則洗自有公論，近期食水安全問題，去年財爺又提過研究海水化淡，到底長遠是否有意減低對內地供水的依賴，值得深思，但以業務營收的爆炸力，以及較電力及基建股低的股息回報，粵投現價吸引力一般，股價的支持很大程度是中國利率預期繼續向下所支撐着。