過去兩個月，圍繞中國金融市場的風風雨兩，令海內、外的投資者對中國市場信心動搖。不過，見得到中央在力挽狂瀾，內部可以做的都做了，是是非非交由歷史下判語。

上周五藍籌表現最勁係中信股份（00267），收報14.94元，升逾6%。同系的中信資源（01205）、中信大錳（01091）、中信電訊（01883）均做好。雖然交投冇中信系咁活躍，但同樣成系起動的還有粵海系，粵海投資（00270）、粵海制革（01058）、粵海置地（00124）均高收作結，相信兩系股份都係試水溫炒作重組概念。在中概股中，橫睇豎睇，都只係國企改革概念股比較實在。筆者依然鍾愛中糧系，本月二十六日公布中績的中糧控股（00606）值得關注。

除了國企改革，年內餘下時間，有關「十三五」規劃的消息將為中概股提供炒作藉口。好似上周五有內地傳媒報道，石化行業「十三五」規劃初稿已成型，預計化工新能產業產量規劃將由千萬噸級提升至二○二○年達億噸級。受相關消息刺激，中石化油服（01033）及上海石化（00338）股價分別升9.6%及7.9%。

講到呢系股，其實中石化（00386）亦唔輸蝕，上月發盈喜，預計次季純利按季增長十倍以上，以首季純利21.72億元人民幣推算，次季純利增長相當可觀，相信是受惠於化工及煉油業務表現強勁。以上周五收報5.8元，跌0.3%，往績市盈率11倍，息率有4厘。本來估值不昂貴，只是第三季宏觀發展不太妙，末季油品需求添變數，不妨先觀望下周公布中績時披露最新營運情況及中石化銷售上市進度等，再作入市部署。