內地成日要標榜「中國速度」，估唔到連匯率調整都追求一步到位，對比中、美財金決策，一個語不驚人誓不休，一係唔做，一做震動全球；一個循序漸進，順著金融市場預期發展，粗疏與圓滑手腕形成強烈對比，可見內地市場風險溢價長期未能收窄，並非無因。

匹克中期業績對辦兼估值唔貴，有一博價值。（資料圖片）

太陽日誌

人民幣的突然貶值，最明顯是見到街上的找換店，將買賣差拉闊到7至10%，講到底就係睇唔通仲要跌幾多，不願囤積人民幣，僅做單邊賣出生意。估唔到連上市公司都中招，時裝零售店I.T（00999）發盈警，就近日人民幣匯率波動，預計手上11.87億人民幣定期存款，將錄得匯兌虧損約6,000萬港元，對八月底止半年業績有重要負面影響，昨日股價急挫5.7%，市值蒸發1.7億元。

人仔貶值I.T損手

由年報所見，二月底止I.T現金等值資產有22.9億元，淨現金5.57億元，對比剛披露手上定期存款規模，大致可以想到，因港元借貸便宜，I.T選擇維持相當比例人民幣定存以賺取息差，過去兩年其銀行存款利息收入為4,025萬及5,904萬元，大約等於同年股東應佔溢利14.4%及18.9%。

中國匯改十年，人民幣兌美元及港元連年升值，加埋港美零息的優勢，坐住人幣博財息兼收之士，實在不少。今次突然貶值，人幣匯價兩日高低位差近兩千四點，唔單止殺匯商一個措手不及，可以預期，像I.T一類以為安全而坐燶匯的事件會陸續曝光，看官手頭上有現金比重高的公司股份，最好搵搵年報，睇睇資金停泊安排。

港匯由早兩日最恐慌一刻的7.764，回到7.752左右的貼近強方兌換水平，可見過去兩日震盪，市場心理因素大於實際走資可能。姑勿論點，港股信心脆弱是路人皆見，恒指尋日僅升102點，收24,018點，扣除騰訊（00700）一隻貢獻百五點，換句話，只計其餘49隻藍籌的話，個市仲未止瀉。

聯想再跌可留意

昨日跌得最勁的聯想集團（00992），一跌就9%，首季業績少賺五成一至1.05億美元，同時宣布裁員3,200人。近排微軟推Windows 10，市場反應認真麻麻，對憧憬個人電腦出現換機潮的，猶如潑咗一盆冷水；內地智能手機出貨量增長，較過去兩年有明顯放緩迹象，不過聯想股價也預早反映，由四月高位14元樓上落到7.7元，幾乎跌近一半。睇番一四年頭起步位7.17元，應該是中長線一個重要支持，如果再插多浸，可以睇位博吓反彈。

匹克體育（01968）派半年成績表，賺1.76億元人民幣，升45.3%，半年賺8.37分人民幣，派中期息8港仙，比去多一倍，半年派息比率七成五，認真慷慨，尋日股價升8.6%收2元。

分析員估匹克全年賺3.97億人民幣，以去年上下半年佔全年純利38%與62%的比例，達標的機會仲係甚高，9倍PE左右，當然唔貴兼且抵博。但先旨聲明，經過過去兩個月，在下對佢唔多唔少有啲戒心，事關六月中匹克趁股價炒到四年高位，見2.94元，跟手大折讓批股，每股2.48元，集資6.8億港元，殺到街客與大孖沙措手不及，雖然話批股遇啱股災，殺到落1.38元唔怪得邊個，不過折讓之大，意味四、五、六月高追的全部要坐艇，短炒如果彈到去批股價附近蟹貨區，要見好就收。