常言道一沉百踩，近個多月的中資股投資氣氛，可謂最佳佐證。北京由監管兩融，到暴力托市，一壓一托都畀市場鬧爆，早排因為出口數據持續萎縮，外資行埋怨人民幣匯值過高，到人行出手，一次過大手貶值，掉轉頭又被班芬佬指責引發新興市場匯價災難，一個唔好彩搞出個新亞洲金融風暴，阿爺真係做又死唔做又死。

阿里睇中蘇寧的龐大銷售網絡及全國物流配送能力。（資料圖片）

昨日港股再插582點，收報23,916點，恐慌氣氛瀰漫魚缸，過去幾年享受人民幣升值，狂借外債而收入主要是人民幣的內房及航空股，借用阿松金句，恐怕「有咁耐風流，有咁耐折墮」，就算客觀睇，過去兩日跌幅已經有點誇張，但人民幣貶值潮開啟，相信會持續一段日子直到外貿好轉，短期應小心為上。

博反彈要先捱價

短短日子，中國暴力救股市、推新一輪國企改革、發改委開turbo審批新基建項目投資、人行注資過萬億落國開行準備大興土木，到今次比市場預期來得更早的將人仔貶值，可以話，個市諗到、預計到，對中國股市與經濟有正面刺激的，中央已通通做齊，個市要揀為淡而淡唔領情，一來提振措施有滯後情況，可能到第四季先見到效果。

但講到底，同七月初暴力救市，眼高手低肉肉酸酸，一陣查惡意沽空、一陣又話唔准國家隊沽貨，市場信心早就蕩然無存不無關係，如今連貶值這被視為壓箱底的必殺技都出埋，一樣隊到開巷，可見個市完完全全是情緒主導，雖然跌過龍味道極濃，但博反彈要有捱價心理準備，唔想空手入白刃，穩陣計都係等個底見咗至算。

講番股事，阿里巴巴宣布以283億元人民幣投資蘇寧雲商，成為第二大股東，蘇寧事後會斥資140億人民幣認購阿里新股，雙方計劃建構線上、線下的零售服務聯盟。

國美表現夠硬淨

表面睇，成件事都不涉及香港上市的股票，但小弟卻唔係咁睇，國美電器（00493）同蘇寧鬥生鬥死咁多年，近年國美由線下走到線上，開始見到成績就快止血，但對手居然搵到一步登天的捷徑，泊到阿里大碼頭，對國美來說，未來競爭更加激烈，消息偏向淡淡地，周二股價仲可以炒上1.61元先回落，尋日大跌市異常硬淨，升三格散場，唔通個市真係賭國美會有樣學樣，搵騰訊（00700）、京東（美股代號：JD）等結盟？

從近期阿里巴巴投資取向，無疑見到全力由線上回到線下的實體商業世界，事實上，阿里心知肚明，股票估值高昂下，唔印公仔紙四出收購，還待何時？印股票的成本低無可低，相反買任何生意，都會為資產與盈利帶來即時好處，情況就如當年香港電訊被盈科印公仔紙吞併一樣。

唔少分析都都認同，阿里主要睇中蘇寧千六間家電店的龐大銷售網絡，以及全國物流配送能力，相比起阿里自行發展，慳番唔少時間。阿里揚言透過蘇寧的物流服務，將來可以達到最快兩小時內送達的目標，亦可借助售後網絡，做到安裝、維修、退換等一條龍式服務。

消息公布後，首當其衝是商業模式接近的京東，連續見兩日裂口低開，前晚在華爾街，股價再跌6.7%至28.02美元。記得兩年前馬雲豪情壯志，預言中國電商的冒起，可以拉倒一線城市商舖租金高昂的情況，估唔到一上市，轉過頭阿里自己就急急落地，實在是何其諷刺？誠如尋日透露，正與阿里及京東洽商策略聯盟的利標（00787）高管所指，阿里與京東僅有平台，卻是沒有內容。