近年興建中嘅沙中線沿線項目成為發展商必爭目標，尋日市建局公布咗馬頭角北帝街/新山道小型住宅項目由新地（00016）投得。該集團已經超過八年未有投到市建局項目，對上一次係○七年投得大角咀洋松街項目，即形品．星寓。

市建局馬頭角北帝街/新山道小型住宅項目由新地投得。（資料圖片）

億京黎裕宗（左）表示，有著名製作人購入觀塘中海日升中心單位。

馬頭角北帝街/新山道項目資料

市建局馬頭角北帝街/新山道項目，喺本月中截標收到20份標書，係該局歷來最多標書的市區重建項目，當劉Sir知道新地中標，即時恭喜佢哋。

單幢值7.4億 建中小戶

新地話，好高興投到市建局馬頭角項目，項目鄰近沙中線港鐵站，交通便利，會計劃興建中小型單位為主。

至於市建局就話，經過詳細考慮同審議後，市建局董事會認為新地合乎項目嘅招標要求，開列條件亦會為該局帶來最佳的利益，故決定將項目合作發展合約批畀新地。

睇番資料，呢個項目地盤面積約1.17萬方呎，項目完成後，預計住宅樓面約8.77萬方呎，提供約160伙住宅，以及約1.76萬方呎商業樓面。市場估計呢個項目市值達7.42億元，屬市區單幢住宅項目。

另外，新地等早前城規會申請元朗榮基村興建折扣商場，項目地盤面積約100萬方呎，計劃以地積比率0.4倍興建12幢最多3層高連1層地庫商場，總樓面約40萬方呎，不過，尋日截交公眾諮詢，就收到多達323份申述。

另外，上水彩園路9號工廈深港中心建議改裝做包括食肆、辦公室及商店等嘅商業用途，總樓面超過31.38萬方呎。根據公司註冊處資料，項目申請人SHELL FAIR REALTY LIMITED 嘅董事包括鍾棋偉等。該人士係華廈置業家族成員。

卓能灣仔商廈賣近8億

沙中線會過海，帶旺灣仔地區，近排該區又有大手成交。卓能集團（00131）喺灣仔嘅卓能廣場全幢，啱啱以7.9億元賣畀德祥地產（00199）間接全資附屬公司，呎價逾1.4萬元，較意向價8.8億元低逾10%，卓能主席趙世曾話，短期會在港島區租用寫字樓作總部，坦言「預咗捱貴租」。

億京黎裕宗話，著名製作人蕭潮順以約460萬元購觀塘駿業街中海日升中心中層P單位，早排影星余文樂亦以逾2,000萬元買入一個單位。