早前股市大上大落，仍然震不散高企的樓價，無殼一族要達成置業夢想惟有諗諗計。若然因私樓樓價高不可攀而難入市，居屋、公屋又嫌不太啱心水，不如走中間路線，放眼港九新界一些星級夾屋，樓價較親民之餘，居住環境拍得住私樓，現時兩房戶475萬元起可做業主，上車不妨「揀呢啲」。

欣圖軒目前只有4個放盤。

夾屋是房協於九十代發展「夾心階層住屋計劃」的屋苑，由於業主要補地價才可轉售，買賣向來不算活躍，但隨着私樓樓價愈升愈無譜，部分置業者追落後向夾屋埋手，令交投重現生氣。

上半年買賣旺

據中原研究部綜合土地註冊處數據資料，上半年共錄90宗夾屋買賣登記，創一三年上半年以來次高，當中葵涌浩景臺、鴨脷洲悅海華庭及何文田欣圖軒分列交投最旺的首三位。

事實上，在全港十個夾屋屋苑中，上述三個最Hit夾屋可謂各具賣點，加上樓價較同區私樓平一截，向來是夾屋Fans入市之選。

若然對會所情有獨鍾，可揀悅海華庭及浩景臺，前者與海為伴，環境優美，兩房盤580萬元起錶；後者地勢高空氣好，近期現減價盤，入場費降至475萬元，實用呎價萬元有找。至於欣圖軒位處名校區，家長客至Like，兩房戶526萬元有交易。