滬港通行咗半年有多，但至今大部分時間使用額度仍欠活躍，在淡季更加無助帶動港股交投，真令人失望。昨日港股成交連800億元都冇，予人水盡鵝飛之感。

A股精要

A股續打滬綜指四千點保衞戰，昨升2.4%以4,123點收市。不過，如今A股最重要係尋找回歸市場之路，官方默許下繼續放紙鳶，可能好心做壞事！

昨日A股國企改革有人氣，港股相關概念股亦見有資金流入，如中糧系股份─中國食品（00506）及中糧控股（00606）分別升5%及4%，節能海東青（02228）升1%。

到底講咗兩個幾月的國企改革頂層方案係咪真係就快出台，不得而知，但顯然一日未出，相關概念股都唔缺翻炒題材，到時到候又會撻着開車。

大成孖寶燒冷灶

近日大成系股價異動，其中大成生化（00809）股價昨日再升15%，同系大成糖業（03889）亦升12%。呢系股份股價經已低迷咗成年有多，今年次季曾經隨升市大炒過一轉，但一場大跌市又回落至起步位咁滯，冷不防咁又快又可以重新起動，留意會否有動作跟尾。

此外，龍源電力（00916）見異動，高位做9.25元，收報9.22元，升3%，成交達9,770萬元。早前公司公布，上半年發電量按年增16%，比對行業平均水平，算係唔錯，而經歷多次減息降準，有助降低財務成本。

公司首季純利同比增長43%至10.29億元人民幣，相信中績亦會報佳音，可納入觀察名單。技術走勢方面，10日線正醞釀抽穿50日線，若交投轉活，有機會再重遊10元大關，回吐宜守8.7元。