昨日內地滬深兩市分別跌3%及4.6%，A股化的港股雖然僅跌0.2%，至25,055點收市，叫做力守兩萬五關，但其實市底相當疲弱，主板成交僅僅過千億至1,046億元，指數主要係靠幾隻藍籌股力撐，滙控（00005）、友邦（01299）、中移（00941）就已經一共為恒指貢獻62點升幅，相反共有34隻藍籌下跌或持平，唔排除大戶係撐住個指數來沽其他股份。

市場對乳品質量要求提升，有利作為行業龍頭的蒙牛。（資料圖片）

選股策略宜保守

再者，昨日主板下跌股份接近千三隻，但上升股份三百隻唔夠，其中升幅榜得17隻有雙位數升幅；反之，前幾日反彈過一輪的「港A股」普遍跌幅唔細，反映投資者見今轉反彈浪勢頭開始不對勁，故紛紛沽貨食胡，短期內相信該批資金再重新入市意欲不大，同樣打擊後市進一步反彈動力。

國指昨日跌1.3%大幅跑輸大市，綜合而言，在A股後市有較大機會「彈完再插」下，港股短期內先行回歸平淡的可能性確實幾大。策略上，本周五為內地期指交割日，後市隨時更兇險，故揀股不妨保守一點，選擇業務性質貼近民生，且相對穩健的大價消費股。

內地乳業股近期雖然同大市齊齊跌，齊齊彈，但幅度相對其他板塊溫和，昨日蒙牛乳業（02319）及輝山乳業（06863）就分別升0.4%及2.8%。事實上，內地民眾對乳品質量要求提升，以及中央持續重申及推進乳品企業整合潮、淘汰落後中小型產能，扶持及優化產業升級等國策，均有利作為行業龍頭的蒙牛乳業。

蒙牛截至去年十二底止全年業績，收入及盈利分別上升15.4%和44.1%，表現理想。而產品組合繼續朝高端進發，其中特侖蘇、純甄酸牛奶、冠益乳、優益C等明星產品深受消費者歡迎，去年銷售增長強勁，相信有關產品今年將繼續成為集團盈利增長主要動力。

龍頭股可享溢價

再睇估值，蒙牛現價往績市盈率25倍，PB約2.7倍，考慮埋乳品板塊市盈率普遍較高，以及蒙牛作為龍頭應具溢價等因素，其實現價尚算合理。

走勢上，蒙牛股價六月跌穿40元關後，最低見過33.35元，但近幾日已快速反彈，昨日收報37.75元，逆市升0.4%，MACD初現牛叉，走勢改善，短期只要股價守穩35元，長線值得關注。