尋日開市無耐，阿爺公布第二季GDP增長7%，好過市場預期的6.8%，兼且維持中央全年保七目標線上，不過數據公布後，A股反而山泥傾瀉，滬綜指由即市高位3,914點，最多瀉4.7%，食晏後低見3,741點，到底係唔符合經濟愈差博人行愈要放水的炒作旋律，抑或懷疑7%的真偽都好，事實係眼見暴力救市的效果逐漸減退，A股大媽面對復牌潮的不明朗，實際啲攞錢走，形成A股一瀉如注。

外資基金要撈貨又無心水，焗住追買友邦等幾隻重磅藍籌。 （資料圖片）

太陽日誌

話說回頭，第二季GDP有7%算是爆個半冷，彭博追蹤38個經濟師，得4個估7%或以上（7.2%及7.4%各有一個！？），主流估6.8%的有16個之多，相當於受訪人數四成二。一般上半年GDP佔全年比重四成五左右，最終一五年能否成功保七？真係要睇在跌市之後的災情處理得好唔好，但可以肯定，人行繼續開大水喉泵水救經濟，是事在必行。

美銀美林一份報告，訪問了全球191位基金經理，統計發現其倉位中的現金比例，由六月份4.9%升至七月份的5.5%，創下○八年十二月以來最高，亦係○一年十一月以來第二高，芬佬主要對希臘債務危機的結果有戒心，加上第四季美國啟動加息已是市場共識，以及中國股市股災，都嚇驚佢地紛紛要錢唔要貨。

暴力救市趕客

一般而言，基金會留住大約4%現金備用，較低現金值反映入市參與度高，看好市況，反之愈高即避險情緒愈高，4.5%以上算高，去到5.5%，並唔常見，反映美國處退市轉角，整個市場風險胃納較低的情況。

傳統高現金比例是看好後市的訊號，但今次對中港股市有冇幫助，小弟都唔敢講咁大聲，尤其中國亂石投林，由人行雙降、國家隊入市，到後期叻到識將沽空分出惡意定善意，到出動公安真刀真槍調查，許升不許跌，已經令一班崇尚自由經濟主義的外資芬佬大開眼界，近一點單睇過去八個交易日，無論A股升市跌市都好，滬股通都係沽多買少，已多少感受到班外資芬佬點睇中國股市。

報告仲有提到，依家芬佬最睇好銀行及自主消費股、歐元區及日本股票，睇淡原材料、新興市場股市及能源股，似乎不妨諗諗，睇吓日股及歐股ETF，分散一下風險。

潛水新股浮面

尋日生產潤喉糖的金嗓子（06896）首日掛牌，收報4.87元，比招股價4.6元升0.27元。早前撞正A股股災掛牌，一度深潛的新貴，部分都有回到水面迹象，好似和美醫療（01509）、天彩控股（03882）及中智藥業（03737）昨日都去過掛牌後新高。

早前提過的中藥顆粒農本方生產商培力（01498），5.98元招股，首日大平賣插到落3.47元，唔經唔覺前日最高上番去5.9元，尋日收5.55元，跌3.3%，近36倍往績PE，貪平撈咗底的，可以考慮食一食胡，但現價要再升，就真係要睇業績同大市氣氛。

港股愈玩愈縮，走勢相當肉酸，尤其以上周三大時代，千四點跌市當日2,359億成交相比，尋日主板交投縮到得1,046億，睇怕北水收工之後，唔使幾耐大市成交會返到千億水平樓下。

港股跌過彈過，明顯見大戶在兩萬五點入市興趣唔大，昨恒指跌65點，收25,055點。上周DEEP V大時代，唔少手上彈藥充裕的外資基金，要撈貨又無心水，焗住追住幾隻重磅藍籌，尋日又再見到類似情況，全日超過千幾隻股仔插水，指數卻跌得相當溫和，全因友邦（01299）、中移（00941）、滙控（00005）及長實地產（01113）四隻撐住，多少反映個市無乜投資主題，基金想減低現金比例，但又唔想冒太多風險，所以買住幾隻高防守力藍籌的倉底部署。