大市繼續呈行三步退兩步的姿態，二三線若然無消息都唔慌炒得起。東航（00670）尋日收市之後發盈喜，預測截至六月底止的上半年純利，勁升249至263倍，料達35億至37億元（人民幣．下同）。

當然，盈喜增長倍數誇成咁，主要係一四年同期盈利基數實在奀得可憐，得1,400萬人仔所致，但睇近期國際油價，又從60美元樓上撻番落50至54美元橫行，同舊年同期近百美元差一截，下半年航油價一定低過舊年同期，再睇大行估全年業績賺60億元人仔左右，按上半年已經超過預期一半來看，全年超額完成機會相當大。

中期業績報佳音

今年上半年，內地整體航空市場乘客量有所改善，而內地又視三大航企會係新一輪國企改革的大熱，預期市盈率10倍左右的東航，值博率唔低。

睇番股價在六月A股未爆前，高見過7.56元，之後最低跌到4.2元，上周報復式反彈，一度升穿10、20及50日平均線，周初最高見過6.49元，過去兩日跟隨整體國企偏軟，多條平均線再度失守，但上半年業績優於預期，假如股價能夠乘勢上番6元樓上，有機會扭轉短期調整勢頭，短炒可先以7.3至7.5元為目標。