一如所料，A股在股指期貨結算前又再起波瀾，滬綜指險守3,800點關，滬市及深市均有逾八百家上市公司股價低收，兩市合共有逾600家公司停牌，市場氣氛似乎又再次逆轉，是否已完成反彈，跌勢再現，不得不有所防範。總之，短期行事須謹慎，自問心血少就索性抖暑，學吓內地良心企業玩「自動停賽」﹗

內地公布上半年經濟數據，GDP同比增長7%，農業生產形勢較佳，工業生產則尚未見有明顯的復甦迹象。到底數據有冇水份，投資者自有盤算，但若然下半年再有大偏差，則全年經濟增長保七，可能未必達標。

中央救市的後遺症逐漸浮現，在港掛牌的A股ETF持續錄得贖回，部分原因是由於A股ETF價格表現跟不上A股的漲勢，致使普遍較NAV存在折讓，引來套利交易。經此一役，外資唔會咁快重新流入，中央只有多主動出招支撐大局。

養老金入市方案火速進行，據講在本周一已結束公開徵求意見，預計將有逾兩萬億元人民幣資金準備入場。國家隊為救市而掃入的「維穩」貴貨，不排除就由老百姓的養老金接貨，到頭來呢場救市到底由誰來付鈔，大家心中有數。

中概股再度受壓

個股方面，早前中資熱炒的中概股，昨日又再遇上明顯沽壓，如元征科技（02488）一度插落12.9元，收報14.32元，跌10%；幸福控股（00260）跌近一成；航天控股（00031）收市跌8%。

展望後市，觀乎大市成交降至只有一千億多啲，大風浪過後，交投趨靜概率甚高，短線炒作都係一動不如一靜。至於中長線價值型投資，其實唔少中概股已經回落至一個吸引的估值水平，只是礙於整體市場氣氛唔就，上車就預咗要坐。

上實城開（00563）股價上周曾低見1.27元，昨日收報1.68元，市帳率0.7倍唔夠，真係夏日清貨大平賣！今年首季其股價低位在1.21元，上周大跌市低位在1.27元，季內若再成功下試該水平承接，應該可以再一次確認底部支持。