水能載舟,亦都覆舟,內地股市唔成熟,成日話淡友有破壞無建設,一遇跌市,就連做股指期貨淡倉都諸多限制,反觀港股周三狂跌過二千點,淡友瘋狂拋空現貨,期指隊到大低水收,但尋日可以見到一挾倉上嚟,威力有幾咁驚人,結果對A股起埋沖起作用,滬綜指由低位足足狂抽一成,收3,709點,是近排不可多得的升市。

專門處理不良資產的信達,業績表現唔失禮。(資料圖片)

太陽日誌

經歷周三的大時代,中資熱錢洗倉洗得八八九九,尋日港股終於絕地反擊,恒指最多升1,179點,尾市升幅收窄,仍升876點,收24,392點,主板成交2,120億元。尋日的反彈究竟有幾咁誇張?單睇升幅達八成的漢基控股(00412),都只能排升幅榜第24位,全日逾千七隻股票升,將前日九跌一升的市況,逆轉變成九升一跌,七月九日可算是普羅股民的大奇迹日也。

值得一提,外資依然對A股抱相當戒心,尋日滬股通埋單額度有164.7億元人仔,意味淨沽凸約34億元人仔,對比本周一開始,淨沽133億、102億、65億元人仔,毫無疑問已經收斂些少。但見香港無論藍籌、國企及二三四線股,以內地術語所講,係出現井噴式爆升,班外資依然隊住個A股,香港同內地邊個市抵博一啲,經已畫公仔畫到出腸。

估唔到內地大媽一面喊救命,居然一路落嚟香港掃貨博反彈,港股通105億元人仔南向額度用剩87.56億元,乃內地救市以來首見。港股通名單升幅首位順風清潔能源(01165)升41.5%,跟住係阿里影業(01060)同阿里健康(00241),分別升38.4%及35.7%。

海通接貨即勁贏

尋日提到,首日掛牌遇啱跌市的培力控股(01498),勁升30.5%,收5元,升幅勁過行家兼對手中國中藥(00570)的16.9%。啱啱低價畀私募基金海峽匯富減持的海通證券(06837),大升市復牌收13.82元,同批股價11.12元相比,接貨者一日就執咗兩成四,都唔知係佢哋有運抑或海峽匯富黑仔。

尋日兩間內地券商發盈喜,啱啱掛牌的國聯證券(01456),預告半年歸於股東的淨利潤錄得非常大幅增加,廣發証券(01776)預告半年淨利潤達83.55億至84.55億元人民幣,按年勁升3.98至4.04倍,買股票同揸車一樣,睇前方而唔係望住倒後鏡,隨住A股泡沫洩氣,因為國家托市,券商無端端又要出錢掃埋一份,再者孖展客最後找唔找到數仲係未知之數,券商股下半年業績的不確定性多到極,實在唔多適合風格保守的股民博反彈。

A股震盪仍難免

狂升之後,睇怕今日升勢點都要抖一抖,內地證監陸續逼打茅波停牌的過千間股份恢復買賣,A股震盪難免,其次希臘與債權人談判周末就去到死線,斷估害怕賭大細的基金經理都唔會揀周五至嚟賭鋪勁。不過小弟覺得本周日大步檻過機會比較大,近排十年希債息級級上,執筆時去到18.5厘,債商已經私下六六折大平賣,在有心理準備要hair cut與無心理準備的total lost之間二選一,你又估佢地會點揀?

中國最大資產管理公司華融,吹風吹得好勁,會無懼市況,鐵定今季內招股上市,華融一類的金融收賣佬,專門在經濟周期逆行、銀行要大刀闊斧剝離不良資產中得益,通常100元的不良資產,會以九成以上折讓,由銀行賣畀四大不良資產管理公司,之後佢地會將之分類,爛數收到就收,收唔到就睇吓有冇變賣價值。

今次華融集資規模唔細,估計超過230億元,預計會由中金、花旗、高盛、滙豐及工銀國際等聯席保薦上市。市面上唯一同類選擇,係一三年經已上市的中國信達(01359),睇番近期股災,佢股價個半月由5.1元隊到依家3.65元,但盤數絕對唔失禮,由一一年賺67.6億元人仔,去到舊年賺118.6億元人仔,三年累升七成五,啱啱先開始銀行壞帳回升周期,一五年PE連7倍都唔到,由於估值風險已經有限,加埋有華融上市的影子概念,博反彈應該有揸拿。