近年居屋樓價升得仲急過私樓，以六月份嘅二手居屋登記嚟睇，平均每宗成交價已經超過390萬元，創咗有紀錄以嚟新高。而最近股市波動，但係對居屋二手市場都無咩影響，新高價個案頻頻出現，好似香港仔逸港居就有個2座單位，由綠表買家以503.3萬元居二市場價買入，實用呎價8,502元，兩個價都創咗呢個屋苑居二市場新高。

居屋樓價續升，每宗二手平均成交價已經超過390萬元。（資料圖片）

二手居屋註冊量及金額按月統計

香港仔逸港居（箭嘴示）錄得居二市場高價成交。

美聯老友話，上個月平均每宗二手居屋註冊金額繼續上升，由五月份385萬元，升到去六月份392.8萬元，再升約2%，創咗有紀錄新高。

而上個月就錄到497宗二手居屋買賣登記，總值約19.52億元，當中有8宗成交價高達600萬元或以上，其中旺角富榮花園14座中高層D室就以約817萬元居榜首，而黃大仙天宏苑A座低層2室同筲箕灣東濤苑C座中高層4室就排上個月嘅第二、三位，成交價分別為650萬與648萬元。

美聯首席分析師劉嘉輝話，近期股市波動，令到樓市氣氛轉趨審慎，不過目前業主持貨力都好強，未有急需大幅減價出貨，所以估計平均每宗二手居屋註冊金額短期內有機會平穩發展。

逸港居綠表503萬沽

講番上半年，二手居屋註冊量累計有2,559宗，涉及金額約95.53億元，按年分別跌咗約9%及增約12.6%。

近期股市咁波動，但係對居屋二手市場都無咩影響，依家繼續有創新高價成交。世紀21怡和地產尹美嫦話，香港仔逸港居啱啱錄到今年第二宗成交。

上述個單位係2座高層A室，建築/實用面積720/592方呎，以三房間隔，望東南有海景，由綠表買家以503.3萬元居二市場價買入，建築/實用呎價6,990/8,502元，創屋苑居二市場成交價及呎價歷史新高。

據了解，原業主喺九九年以134.5萬元未補地價一手買入，依家賣出，升咗超過2.7倍。

頌雅苑6年賺兩倍

中原黃達雄話，大埔居屋頌雅苑都有一宗創同類高價成交，賣出嘅單位係C座高層7室，建築/實用面積724/544方呎，以自由市場價506萬元賣出，建築/實用呎價約6,989/9,301元，屬同類單位新高價。

上址原業主○九年買入呢個單位，揸咗約六年，個單位升值約2.2倍。