Fundman睇市：港股慘成代罪羊

四月初港股大時代的裂口完全補回，意味近兩個多月以來高追的統統變晒蟹民。一年半載內要炒番上唔容易。實在意想唔到，近三十年，港股估值在8至22倍PE之間游走，一五年PE依家得12倍左右，居然咁平都可以發生股災。

過去一年，滬綜指由兩千點起步炒到去五千一點，善忘的市場人士，包括港交所（00388）行政總裁李小加，都突然變得樂觀，仲話A股係全球最安全兼透明股市。七年前揩過大鑊的內地魚缸客，六月初仲當阿爺神咁拜，深信有形之手可以無所不能。家陣睇番轉頭，果然每次崩盤皆萌芽於最樂觀時。

賽後檢討，跌市成因同A股升勢與內地經濟背馳、累積升幅過大、脫離基本因素有直接關係。最慘係四月初威得幾日，已唔肯跟升的港股，卻承受住A股插水的牽連。史提芬昨日同幾個心都淡嘅賓架吹水，異口同聲認定今浪最致命是內地連串笨拙的托市措施，畀大家見到有形之手多麼眼高手低，亂托一通，猶如倒錢落海。

入MSCI短期無望

一九九八年港府托市，其實多少有醫生醫病尾味道，個市已經處低位，加埋大量淡倉一挾就上。反而內地成日出口術控制升市韻律，新鮮感唔夠，托市威力自然大打折扣，在屢救無效之下，政策主導，無自由市場意志的A股，今次所受打擊真係好大。A股也淪為國際笑話，一心想A股入MSCI同FTSE指數，在今輪「暴力救市」之後，恐怕短期內已經唔使發夢。

近幾日，內地證券監管都認真荒謬，容許上市公司胡亂搵藉口停牌免戰，想套現套現唔到的恐慌情緒不斷高漲，令到有雙邊投注的紅色散戶與中資基金，統統落晒嚟香港攞錢。

昨日基金重倉的港A股洗倉毫無章法，恒期及國期即月合約成交分別達13萬張及28萬張之多，現貨沽空創今浪新高，成交238億元，短期大市可能已經歷最恐慌一刻，古語話「水能載舟，亦能覆舟」，龐大淡倉累積如果挾番轉頭，威力同樣非同小可，只可惜即使反彈，睇怕都係重磅的電訊、內險及內銀股行先，散戶至愛的二三線，恐怕首階段未有份。

券商股洗倉有理

內地券商被阿爺逼入市，連日將幾隻權重股愈買愈貴，仲要勒令對散戶孖展多加通融，會唔會因而揩大鑊？睇A股未知仲要瀉幾多，尋日券商股狂洗唔係無道理。

國家隊禁止在A股個場出貨，前晚國投集團有份投資的私募基金海峽匯富，以每股11.12元盡沽手上5.694億股海通證券（06837），比停牌前打個八折，同上星期五收市價18.9元比較，更打了個六二折，舊年十二月海峽匯富先以每股15.62元入股，短短幾日帳面由賺變揩近26億，都在所不計求脫身，似乎有啲啟示。

兩間尋日新上市公司，撞正超過兩千點跌市都算黑仔，環球醫療（02666）收報5元，比招股價8.18元跌38.8%，成為一五年上市公司首日，認購人每手揩得最甘的新股，一手500股輸1590元。

另一隻中醫藥股，農本方品牌經營者培力控股（01498），收報3.83元，比招股價插低35.9%，大手客真係暈得一陣陣，計落往績市盈率24.9倍，睇返在中國領正牌，生產並銷售中藥顆粒的製造商得六間，培力是唯一港資，香港上市仲有間中國中藥（00570），睇番後者，七月短短幾日都跌咗兩成五，往績市盈率22.8倍，原本招股有少少貴的培力，算是一插到位，若未來幾日股價穩定返落嚟，捧場客可留意吓。