本港樓市基調良好，政府及市區重建局項目又有兩項「高紀錄」刷新咗，上個禮拜五截標嘅屯門掃管笏路住宅地，就由首次奪得官地嘅萬科置業（香港），用咗超過38.2億元投得，打破上月中由同區管翠路地皮錄得嘅逾36.2億元舊紀錄，成為屯門區地價最高地皮。至於昨日截意向嘅市建局筲箕灣西灣河街項目亦夠晒誇張，收到多達38份意向書，創史上最多。

屯門掃管笏路住宅地以逾38.2億元批出，創屯門區地價新高。（資料圖片）

林力山上周代表萬科置業入標。（資料圖片）

政府及市建局項目創「雙高」

地政總署公布，中央投標委員會授權該署將上述掃管笏路住宅地批予出價最高投標者，成交價逾38.2億元。今次由中資財團萬科擊敗其餘9間「本地薑」獨資投得，每方呎樓面地價約莫4,541元，符合市場預期。

總投資90億兩年後開賣

劉Sir知道，雖然今次掃管笏路地皮嘅呎價，唔及上月中批出嘅同區管翠路地皮錄得嘅4,621元，但由於掃管笏路地皮個規模大少少，所以地價就趕過咗管翠路地皮，成為屯門區最高價單一住宅地。

老友萬科林力山話，今次係集團首次投到政府地皮，地盤規模大，有發展彈性，可作分層住宅同埋洋房發展，預計總投資額約莫90億元。

對於股市狂瀉，林力山就唔係好擔心，佢話房地產係長遠投資，股市嘅短期波動唔會有太大影響，初步計劃二○一七年尾賣樓，項目預計二○一九年落成。

而噚日截收意向書嘅市建局西灣河街項目，反應更加係旺到癲，市建局公布，呢個項目一共收到38份意向書，預計招標工作會喺短期內展開。該項目收意向書數目，打破土瓜灣北帝街同灣仔莊士敦道項目共同保持嘅32份舊紀錄。

私宅落成量僅達標18%

至於有份遞交意向嘅財團，劉Sir知道，啱啱攞咗屯門掃管笏地皮嘅萬科都有遞交意向書，至於新世界（00017）、會德豐地產等大型發展商，以及遠展（00035）、英皇國際（00163）、金朝陽（00878）、泛海國際（00129）、大鴻輝、宏安（01222）同埋協成行等中小型財團都有入意向。

另差餉物業估價署截至五月底最新數據，今年首五個月私宅累積落成量共約2,358伙，只係佔咗全年預測數字約18%。