港股勢頭本來唔錯，恒指已經連續四個交易日反彈，但希臘同債權人最終未能達成協議，令歐美股市應聲下挫，港股亦難幸免，恒指低開75點，早段喺內地股市仍然做好下，仍然企穩，但到內地股市掉頭向下，恒指跌勢即加劇，埋單跌259點，收報27,145點，國企指數亦跌216點，收報13,467點，全日成交金額1,185點。在大市氣氛偏淡之下，尋日主板有925隻股票下跌，升的只有500隻。

北京建設透過子公司拓展天津港項目，發掘自貿區商機。(資料圖片)

尋日早段金融股做好，滬綜指更一度突破4,700點關口，但午後重磅股顯著回落，令滬綜指急轉直下，更一度失守4,500點關，最後雖然返回4,527點收市，但全日仍然要跌162點，深成指亦跌619點，收報15,692點，昨日滬深兩市有接近2,000隻股票下跌，其中有132隻跌停板。

大同刀仔鋸大樹

計埋今日，六月只係剩返三個交易日，即係話「六絕」魔咒就快過，唔少投資者都希望七月可以翻身，今日適逢禮拜五，唔知會否好似之前咁，喺憧憬人行放水同埋深港通有公布之下再炒高，但阿莊覺得經過兩次狼來了之後，市場反應應該無之前咁大。

近日唔少細價股股權出現易手，其中馬斯葛（00136）獲恒大地產（03333）及騰訊（00700）認購股份，令市場再次掀起尋寶熱，睇吓仲有無漏網之魚。阿莊之前提過的大同集團（00544），尋日亦逆市做好，股價升11%，以0.3元收市。上個禮拜大同亦曾經抽高，之後回落整固，尋日一度衝高至0.32元，如果今次又好似上次咁回番落黎，投資者不妨趁機上車，睇佢個走勢就好對辦，不妨買少少刀仔鋸大樹。

北京建設（00925）尋日逆市做好，股價升3.89%，以0.8元收市。事實上，北京建設在今次升浪之中，升幅唔算大，唔排除有追落後空間。

北京建設主要從事物流業務，包括電子商務、口岸相關物流地產及冷鏈物流，近日集團宣布旗下合資公司北建通成與天津港（集團）全資子公司天津港經濟技術合作有限公司訂立合資合同，雙方將成立一家合資公司，以投資天津港項目，項目將分兩期，第一期將位於天津自貿區試驗區內，料明年底或之前完成。此外，集團較早前亦成功收購武漢土地及興建倉儲設施，發展積極。

北京建設昨日走勢初現突破，料今轉有機會挑戰1元關，阿莊準備今日在0.8元附近買入10萬股，上望1元，止蝕0.72元。