細價單位做價日日破頂，最近三房戶表現都唔輸蝕，好似青衣灝景灣今個月連錄千萬元成交，啱啱有9座高層三房戶以1,155萬元賣出，創同類單位新高，實用呎價去到約1.48萬元。而面對同區有唔少新盤競爭嘅將軍澳區，二手價都無回軟，最近峻瀅有個中層套三房單位以同類新高價680萬元賣出。

青衣灝景灣三房單位，月內連錄兩宗逾千萬元成交。

細價樓升幅強勁，三房單位亦不甘墮後，頻錄破頂成交。

近日市場部分破頂成交

中原黃國強同劉Sir講，灝景灣今個月暫錄6宗成交，其中2宗做價逾千萬元，一個9座高層A室，實用面積778方呎，屬套三房加工人房間隔，望海景同市中心景，以1,155萬元賣出，實用呎價14,846元，創咗同類三房戶新高價。

該行伍錦基表示，峻瀅II早排開售成績理想，連帶一期單位交投都轉活，峻瀅6座中層A室，實用面積694方呎，外望向東山景，本月初開價660萬元，最終以680萬元售出，創咗屋苑套三房戶做價新高，實用呎價9,798元。

利嘉閣陳渝東稱，東涌映灣園15座高層B室三房戶，實用面積749方呎，成交價706.8萬元，實用呎價約9,437元，創同類單位新高價。

海栢兩房連環新高

兩房單位都繼續闖高價，祥益地產黃振文話，屯門大興花園2期9座高層F室，實用面積447方呎，獲區內買家以438萬元購入，實用呎價約9,799元，比五月時嘅舊紀錄再高2%。

美聯陳惠玲表示，馬鞍山海栢花園今個月內出現兩宗破頂價成交，啱啱賣出嘅1座高層D室，實用面積約438方呎，成交價約575萬元，實用呎價約13,128元，創同類新高。

DIVA呎租67元開齋

就快到暑假租務旺季，近期租務市場已經蠢蠢欲動，好似入緊伙嘅北角DIVA，啱啱錄到首錄租務成交，中原陳家鴻話，租出嘅高層B室，實用面積493方呎，屬兩房間隔，享開揚景，以月租3.3萬元租出，實用呎租約67元，若果以業主舊年七月買入價1,003萬元計，租金回報率約3.9厘；依家屋苑供應以兩房戶為主，兩房戶租盤叫價由2.6萬元至3.5萬元。

此外，市場繼續有學生租客承租單位，該行陳燮佳表示，粉嶺名都7座中層G室，實用面積約454方呎，由4個內地嚟香港讀大學嘅學生承租，月租約1.25萬元，實用面積呎租約27.5元。