MSCI肯唔肯加A股入指數的結果公布前夕，內地股市繼續瘋狂，滬綜指破五千一關口，又升2.1%，惟依然無法扭轉港股唔跟升的形勢，恒指早市最低見過27,060點，午後A股破頂，港股由跌轉升，不過升幅有限，最後以27,316點作結，升56點，主板成交1,510億元，升跌股份比例1:1.4，可見指數雖不跌，但唔少非成分股表現疲弱。

股權追蹤

上周五，恒指創四月二十日以來最低收市，昨日觸及50日線27,191點後回穩，但未足以令後市脫離危險期，睇番五月二十八日，恒指重挫630點，當日一口氣跌穿10日及20日線，之後一連多日未能重返10日線上，絕非一個牛市應有表現。

過去幾個交易日，指數有勢朝四月九日升市裂口位26,732點，亦即是兩個月以來的高位橫行區底部推進，一旦觸及裂口大市無即時反撲，意味一個大成交高位派發完成，大市要再向上突破，難免遇到相當蟹貨阻力，尤其A股升勢證明無法對港股起到太正面作用，最怕MSCI消息會令A股出現反高潮，拖累埋港股。