唔少本地家長為咗令仔女入到心儀嘅學校，會「孟母三遷」，而內地家長都差唔多，好似有個內地人上個星期六收到小學派位後，第二日就一早嚟香港搵樓，半日內已決定以440萬元買入天水圍嘉湖山莊三房戶，今次入市豪畀百萬元辣招稅同使費。而內地學生都殺到，粉嶺今個月就有至少10宗內地學生租樓個案，個別仲高市價20%豪租粉嶺中心三房戶。

本港樓市升溫，最近更錄得內地家長客為方便小朋友上學而入市個案。 （資料圖片）

內地客部分租買個案

祥益蕭嘉偉同劉Sir講，有一個深圳客上星期六，知道佢小朋友派咗去天水圍嘅小學，星期日一早過嚟香港搵樓，一直睇、睇到黃昏即以440萬元，買咗嘉湖山莊麗湖居9座中層H室，實用呎價8,044元，今次仲豪畀近百萬元買家印花稅、雙倍印花稅及使費，而個單位三年升值逾80%。

各區開始有內地學生租客。中原藍浩然話，粉嶺區今個月有至少10宗內地學生租樓個案，其中，粉嶺中心H座高層三房戶以月租1.6萬租出，高市價20%，實用呎租31.3元。

該行杜文俊稱，沙田好運中心竹林閣低層G室，業主應承添置家電，3個內地學生即夾份承租，月租就係開價1.4萬元，實用呎租32.8元，仲先畀一年租金。

海栢頂層首破千一萬

講開近期市況都唔錯，好似馬鞍山上車盤海栢花園，樓價首破千萬元。世紀21奇豐周淑萍講，屋苑3座一個連天台單位，有內置樓梯上天台，實用面積771方呎，個盤交吉同放咗盤五年，開價由1,000萬元，加到1,200萬元，一直唔減價，終於等到賣1,150萬元，實用呎價14,916元。估計呎價創全區二手新高。

沙田夾屋實呎過萬二

青衣盈翠半島短短半個月三次破頂。利嘉閣彭錦添話，屋苑11座高層F室以1,288萬元賣出，實用呎價16,345萬元，創標準單位新高。

中原黎浚宇講，沙田夾屋晴碧花園1座高層E室，賣575萬元，實用呎價12,234元。市場估計創新界夾屋最高呎價。

將軍澳二手樓價再升。中原伍錦基話，峻瀅3座高層兩房B室，喺新盤賣晒後，以539萬元賣出，實用呎價約10,823元，創咗屋苑新高。

有消息稱，同區首都5座左翼高層C室售590萬元，實用呎價11,368元，個價都唔錯。