上周五滬綜指成功突破5,000點關口，為七年內首次，諗住在內地股市做好帶動下，港股都會有運行，點知港股都係升唔起，市場焦點又落係希債問題上，加上周四晚道指下跌拖累，周五恒指跌291點，收報27,260點，國企指數跌212點，收報13,914點，主板成交1,584億元。

中糧包裝主打消費品包裝生產，近期積極收購壯大業務。（資料圖片）

周五藍籌股整體表現偏軟，長實地產（01113）再跌3.28%，中資金融股亦有沽壓，惟兩隻國指新貴中廣核電力（01816）及萬達商業（03699）逆市呈強，股價均創上市新高，分別收報5.43元及77.2元，升幅有5.64%及8.5%。根據過住經驗，呢類指數新貴，往往高潮過後都會有回吐，所以無貨的話現水平絕對追唔過，有貨的不妨考慮食胡。

炒細價股量力而為

港股弱勢畢現，相信短期有機會下試27,000點關口。之前市場氣氛向好時，個市即使跌，股仔都有得炒下，但上周數字王國（00547）可換股票據持有人車峰被補，拖累股價連日下挫，而其他細價股亦受牽連，周五主板共有1,003隻股票下跌，升的只有462隻，表現認真麻麻。在市場氣氛偏淡下，家陣入市玩細價股都唔好太過進取。

中糧包裝（00906）上月中旬一度升過上6.3元高位，主要是市場憧憬中糧集團系內會進行重組，惟之後股價反覆回落，上周一度隨大市下跌，更一度跌至50日線5.15元水平，惟於50日線水平現承接，周五更逆市反彈3.4%以5.43元收市。

中糧包裝屬中糧集團系內的公司，主要從事消費品所使用的包裝產品的生產，四月期間，集團向獨立第三方收購永富容器（哈爾濱）91.3%間接權益，其主要於中國從事開發、生產、銷售用於食品、種子、石化、塗料等金屬塗潢包容器產品，相信收購有助進一步擴大中糧包裝的業務規模。

截至去年十二月底止全年業績，集團錄得純利3.46億元人民幣，由於集團最大客戶加多寶打輸官司後，將由紅罐轉為金罐，但換句話說，不明朗因素已經消除。以周五收市價計，中糧包裝往績市盈率只有12倍，估值有一定吸引，若然母公司落實重組，相信亦可成為刺激股價上升的催化劑，不妨趁低買入，料中線可重返6元水平。