政府近年密手推地，屯門區今個禮拜五又有一幅地皮截標，就係屯門第56區管翠路嘅大型住宅地，市場預期呢幅地每方呎樓面地價約3,500至5,500元，估值約27.5至43.2億元，有機會問鼎屯門區最高地價地皮。有測量師老友就話地皮發展規模較大，對啲大型發展商更有利，預計可以收到約莫12份標書。

高緯環球張翹楚預計，屯門管翠路地皮可吸引12家財團入標競投。（資料圖片）

張翹楚

劉Sir知道，嚟緊禮拜五截標嘅管翠路地皮，佔地約莫26.2萬方呎，指定用嚟做私人住宅用途，最高可建樓面逾78.5萬方呎，高度限制喺主水平基準之上80米，估計將來可興建物業最高約莫20層。

可建洋房 料混合發展

政府公布嘅賣地章程顯示，呢幅地有唔少發展要求，除有斜坡問題，未來發展商要負責斜坡日後嘅保養等，另臨近屯門公路，要遞交噪音評估及興建隔音屏障。

測量師老友高緯環球張翹楚同劉Sir講，相信管翠路呢幅地皮可以吸引到約莫12家財團入標競投，預料會以洋房，同埋中高層嘅住宅混合發展，至於樓面呎價就估計約4,800元，計番估值大約37.7億元，相信有機會成為呢一區最高地價嘅地皮。

佢仲同劉Sir講，呢幅地皮位處較高位置，雖然有斜坡及環評等問題，但由於地皮景觀好，加上鄰近新盤星堤，相信唔會影響呢幅地嘅競投氣氛；同埋呢幅地皮規模大，估計地價連同建築成本接近70億元，對啲大型發展商更有利。

中原黎堅輝話，近期新盤熱銷，市場氣氛唔錯，所以調高呢幅地估值10%，至約43.2億元，每方呎樓面地價約5,500元。

同區住宅地供應續來

劉Sir仲知道，呢幅地皮鄰近嘅新盤係新地（00016）發展嘅星堤，呢個屋苑分層戶近期嘅二手實用呎價約9,500元。但劉Sir睇番，未來屯門區仲陸續有唔少地皮推出嚟賣，包括之前已經正式招標嘅屯門第56區掃管笏路地皮，喺下個月3號截標。

據悉，呢幅大型地皮佔地超過29萬方呎，指定用作私人住宅用途及幼稚園，地積比率約3倍，最多可建樓面逾84.17萬呎，係今季推出最大規模嘅一幅用地。

屯門管翠路地皮基本資料

項目：屯門第56區管翠路住宅地

地盤面積：約261,958方呎

總樓面：約785,356方呎

市場估值：約27.5至43.2億元

每方呎樓面地價：約3,500至5,500元

截標日期：本周五