睇住個市近千一隻股票大插插，尚有進帳的不到六百隻，但恒指居然有近二百點升幅，實在有點玄幻。恒指收市升190點，收27,657點，分拆自長和（00001）的長實地產（01113）首日登場，因為市價與理論除淨價有差距關係，貢獻超過200點，一隻股票頂住恒指，反觀缺乏長地因素支持的國指要跌86點，收14,114點。

受惠樓市及基建需求，水泥股業績復甦在望。（資料圖片）

太陽日誌

贏27%

唔經唔覺，四月初中證監放寬公募基金經港股通入市消息，幫港股強勢破位，輾轉已經差不多兩個月時間，恒指在27,000至28,500點之間橫行，今日指數在27,600點，在上落區中間落墨，實在唔算標青，亦都同愈戰愈勇的滬綜指強勢，扯唔上半點關係。

股市往往多數服從少數，當酒樓茶客及的士司機都變晒股票專家，以為一定會發生的，事實往往唔跟劇本進行。滬港通最初以為會將AH股差價收窄，結果通車前炒差價活動早就玩完，滬港通真正成行，差價反而因為A熱H冷而各走各路，由AH差價指數顯示，今日A比H平均反而高出三成。

港股通繼續冷場

四月初，公募基金獲批經港股通入市消息，港股癲了兩日，港股通額度亦都罕有出現爆額，經過七個禮拜時間，要改基金章程的基金，手續應該老早辦好。反觀港股通額度，一連兩日都係用咗6億人仔左右，唔夠105億人仔每日上限的一成，兩市大門打開，南來入貨基金卻是冷清非常。A股兩市成交，仲係維持日日比港股多十幾倍的癲狂，在在反映內地基金及大媽大叔，對隔山買牛興趣唔大，近兩個月多隻二三線暴升股，說穿了不過是少數內地南來、鍾意吼冷門的莊家，以及本地炒鬼趁亂所為。

傳統智慧話，大股東肯私有化自己公司，來來去去得幾個理由，一係睇好業務快將步入收成期，反之街外股東睇唔到，造成股票價值被市場低估；又或者流通量太低，發揮唔到資本市場作用。去年台泥（01136）大股東以每股3.9元私有化，被股東投票否決，估唔到一年後，出盈警提到上半年業績倒退不特止，仲來個二供一，每股作價2.2元，比去年私有化出價足足低43%。

首季內地發展商施工量出現倒退，是近年罕見，水泥行業龍頭海螺（00914）首季業績都要跌31%，台泥第一季業績唔掂，可說非戰之罪。

隨着人行狂放水，樓市需求好番，加埋阿爺搞個一帶一路，基建救經濟，下半年水泥價格與需求，點計都比上半年好。早排海螺提過第二季業績已見復甦端倪，台泥高管也有類似預期，在業績去出黑暗盡頭，即將見到光明一刻，先至來個低價供股，確實惹人遐想。

股份價值被低估

作較壞打算，即使台泥下半年業績追唔番晒上半年，一五年盈利跌三成去到14億（街外平均估19.2億！），未計攤薄PE係6.5倍，舊年大股東以6.4倍私化失敗，無理由呢個價輸得死人，近排由3.5元隊落尋日2.79元，有貨記住供，冇貨亦可諗諗買番嚟供埋一份，唔好執輸。