港股一直唔肯跟A股升，轉頭A股一插，港股居然照辦煮碗玩笨豬跳，碰正期指結算日，筆者以為六月期指開27,905點唔算高執到寶，結果一早擺低兩百幾點學費，尚幸走得快兼且只做三分一注，否則真係大大鑊。

股權追蹤

周二開始，期指及國期轉好倉的成本都持續高企，恒期為例，撇開除息因素，轉月成本要額外80至100點高水，尋日早市見「水位」收窄，是否意味好友大戶唔計價轉倉完成得八八九九，引來淡友大舉反攻，已無法深究。尋日六月期指早市見過27,945點高位後，全日試底，現貨開市後，直奔26,913點低位，足足行了1,032點，認真弱到暈，臨收市穩住，日市收27,112點，較合理值27,115點仲要低水3點，過去幾日轉倉六月的期指客，真係「價」、「水」齊揩。

昨日跌市，證明四月九日的大升市後的長方形橫行市，仲未玩完，以期間高低位28,588及26,732點，恒指刻下又低於中位數27,660點，似乎又返到泥漿摔角的悶局景況。