Fundman睇市：中信資源有睇頭

兩融額度企穩2萬億人仔掂住天花板，加埋未來兩星期大量新股凍資及人行突然正回購，擺出短期收水姿勢，火箭一樣的A股終於受地心吸力影響，滬綜指破五千關口不成，倒過來大插6.5%收4,620點。

不過，現價計滬綜指年初至今仍累積42.8%升幅，中國創業板更係升133%，是全球之冠，總算有咁耐風流先嚟折墮。但港股就無咁好彩，今年四月九日因放寬公募基金南下入市興奮一陣之後，橫行超過個半月，尋日一跌就626點，收27,454點，跌幅2.2%，國指跌幅更大，跌3.5%或者518點，收14,183點，全日有近千三隻股票向下，跌勢全面，同日先後有186隻股票創過五十二周高，果然應了上帝要你滅亡必先要你瘋狂，當人人前仆後繼，炒股仔炒到不亦樂乎時，震倉潮就殺到埋身。

隨着中港股市的熱錢與炒股文化進一步「融合」，神經盤真係愈來愈多，盈富基金（02800）昨日臨收市兩分鐘由27.9元掃到上28.5元倒升收市，在大跌市下堪稱奇景。

大媽盤掃高盈富

以為春江鴨叻到未卜先知，預見今日股市反彈掃盈富？睇落又唔似，單係四點後六月期指最後十五分鐘交易，低水幅度仲曾經擴大，扣埋六月除息因素，最後都要輕微低水收，畀貴六、七毫子溢價衝盈富都唔曉買期指，可見神經盤唔似專業炒家，更似係要趕收市前買齊而唔多錫價的大媽盤所為。

尋日小型股災之中，綠地香港（00337）罕有在內地發展商股價一片紅之下，逆市不跌，仲拗腰升1%，收報7.86元。睇番前一個星期，公司批股集資16.8億元搞互聯網金融，街外已經傳話要貨基金一股難求，近幾日分析員會議，綠城高管鴻圖大志，講到三年內新的互聯金融平台，可以達到千億人仔交易規模目標，睇嚟吸引唔少機構投資者落疊。尋日花旗出報告睇到11.1元，難怪批股之後股價異常硬淨，掂都無掂過批股價7.46元，短期要（目及）實。

盈警不跌有玄機

跌市中唔肯跌的特別值得留意，尤其資源股呢排唔啱炒鬼胃口。中信資源（01205）早兩日發盈警，原因係國際油價疲弱拖累，但五月股價反而由1.4元起步炒到上2元。

上個月，中信資源話等緊印尼油氣田Lofin-2的勘探報告，但揸住油氣田2.5%權益的澳洲上市公司Lion Enegry，尋日就搶閘在公司網頁披露勘探結果，指探明油氣層厚度介乎1,106至1,300米，每日產量17.8mmcfpd（1,780萬立方英尺），相當於5,040萬立方米。

翻查資料，該油氣田係中信資源在○六年以7.6億收購印尼Seram項目時一併買回來。油氣田價值同勘探技術及難度掛鈎，這方面小弟係門外漢，相信油田價值更重要係潛在蘊藏量有幾多。

嘗試在網上找找中海油（00883）近年的油氣井勘探重大發現的個案，今年三月，在凌水17-2大型氣田，探得油氣層厚度55米，已譽為中國海域深水勘探的重大油氣發現。

睇再遠少少，去年十月，加蓬海崖探明一幅200米厚的氣層，也被視為中海油一大發現。對比下，印尼Lofin-2探得的井厚度，足足比中海油的「重大發現」仲要厚五至六倍，對比中信資源155億市值，大約係中海油的2.8%，會唔會真係掘到寶，睇五月開始的異常強勢，睇嚟機會真係唔細。