尋日滬綜指收4,941點,升30點或0.6%,兩市成交2.15萬億元人民幣,相當於2.69萬億港元,足足是昨日港股1,575億成交的十七倍。

內地即食麵減價戰有緩和迹象,康師傅最壞時刻料已過。(資料圖片)

太陽日誌

綜合市場預測康師傅業績(美元)

雖然國家隊近排接連出招,先係放寬公募基金經港股通入市,跟住又開放兩地基金互認,希望一方面為北水排洪,同時又可搞旺港股通。不過,A股七年來首見癲市,大媽大叔搵錢至上,又邊個肯轉飯鑊落嚟做開荒牛?尋日港股通花掉19億人仔配額,經已係近排至巴閉紀錄,但同內地魚缸交易量完全無得比。

由樂觀角度,近期即使唔少二三線莊家股藉大媽入市傳言炒到出煙,一兩個星期內股價以倍數飆升的比比皆是,但對比A股而言,仍未有耐配得上個癲字。外資芬佬擺出一副姿態,係用槍指住個頭都唔信港股會升到咁癲,形成暴動股有暴動股炒,指數就誓死玩拉牛上樹。萬一A股出現三幾百點回吐,你話港股可以完全置身事外,睇怕都幾難。

前晚,聯儲局主席耶倫講到明今年內加息在所難免,華爾街三大指數腳軟,恒指開低後全日逐少試底,午市後破一破兩萬八,最後拗腰收28,081點。期指結算前夕,好友大戶力托意圖明顯,六月期指日市收27,840點,表面低水241點,但扣番六月藍籌除息因素,實際高水近百點。千祈唔好以為大戶睇淡六月,由五月轉六月倉要額外畀多近110點溢價,可見期指好倉客多兩錢肉緊,短期唔能夠睇得太淡。

米蘭站不宜沾手

近期由0.9元起步炒到上2.6元的米蘭站(01150),大股東向第三方批售1.12億股,賣完仲保留3.75億股,股價十一點半左右開始山泥傾瀉,最後急挫46%,收1.22元。論基本因素,今日內地客使錢愈見縮皮,加埋一簽多行玩完同埋內地六月調低關稅,除賣枱外,實在無理由支持接火棒,但偏偏尋日見插到1.5元樓下,唔少散字派衝入去,股市膽生毛之輩唔少,可見一斑。

內地統計話今年首四個月,內地股民獲利1.4萬億人仔,除開每人15萬幾。搵到錢自然手頭鬆,早排已經講過非必要性消費,好似百貨、白酒股應有一炒條件,當日推介銀基(00886),一個月唔到經已升近八成。近日所見,呢個故事有延伸到其他生活消費品身上的趨勢,昨日所見,果汁、乳業、奶粉、副食品股通通都有捧場客,炒味夠而交投又較有瞄頭的,有海升(00359)、匯源(01886)、統一企業(00220)、雅士利國際(01230)、阜豐(00546)等。

季績有見底迹象

啱啱出業績的即食麵一哥康師傅(00322),首季少賺16.6%,營業額亦跌16.5%至23.2億美元,兩大主營業務,包括飲品及即食麵收入按年跌18.9%及13%,不過股價反而在大成交配合下,由五十二周低位抽升6.6%,收17元。講到底,內地即食麵減價搶市場的戰役有緩和迹象,康師傅按年收益雖仲未止跌,但同去年第四季比較已大幅回升17.7%之多,似乎最壞時刻已過。

之前講過,低通脹低原材料價,對幾隻食品股都有利,只係今浪碰上整體消費市道唔好,加埋減價促銷拖累銷售額向下,先至無人敢掂佢哋。睇番首季即食麵及整體毛利率都有改善,季績有見底迹象,一五年PE24.9倍,是○八年以來20至39倍區域的中下限,股價應見了中長期低位,若未來回到中位數估值附近,股價見20元應唔難。

贏118%

阿莊於五月十九日推介自動系統(00771),股價本周二正式開車,過去兩個交易日以大陽燭急抽,以高低位計爆升逾1.1倍!