港股繼續睇A股做頭，但升勢一直擺出逢二進一，唔願完全跟升的姿態，話就話港股A股化，不過始終指數成分股主要參與者，仲係國際機構投資者，對於內地經濟愈差股市愈要炒的背馳玩法唔太受落，形成港股高位膠着的悶局。

股權追蹤 2015/5/19

尋日期指以27,549點開出後，好快在27,424點見即市低位，午市見過27,697點全日高位，好淡雙方都無意主動出擊，悶局收場。日市期指收27,679點，成交僅4.7萬張。中資金融股做好，主戰場國指期貨有9.3萬張成交，升幅在恒指之上。

上周五期指高低波幅677點，周一縮至449點，昨得273點，經過兩日有限度整固，十五分鐘圖上三角形形態已走到盡頭，好淡友係時候分勝負，如破27,930點，可試28,300至28,621點之間，反之，如周一、二低位27,253至27,424點再失守，期指至少要試26,708至27,000點之間，一於等破位見到開大開小徵兆至追。