當個個以為假期前港股實靜，點知A股大媽來個逆向操作，示範佢哋威力有幾大。藉住魚缸傳周五收市後深港通有消息發布，港股食晏返嚟，出現井噴式急抽逾六百點，即使港交所（00388）迅即澄清，餓股多時的好友一於少理，指數回過一浸，之後尾市又挾過，收市升535點報27,822點。

蘋果公司快將舉行發布會，或帶動相關概念股再炒一轉。（資料圖片）

太陽日誌

即贏20%

港股A股化唔單止股仔炒得瘋狂，北水南下勝在錢夠多，連大藍籌照樣舞高弄低，50隻藍籌總共46隻向上，可見周五資金掃貨都相當全面。

國家要搵虛擬世界救實體經濟，總理李克強呼籲要加快「互聯網+」發展，要有基建配合，尤其內地上網慢的弊病急需解決，工信部要求網絡供應商提速降費，三大電訊隨即推出唔同數據平Plan搶客，畀住些小甜頭用家，提升滲透率。

瑞東復牌勢爆升

三隻移動網絡股上周五均做好，中移（00941）升3.6%，聯通（00762）升2%，中電信（00728）則升3.8%。馬雲以26.9億入股瑞東集團（00376），瑞東未復牌，炒鬼玩住因為交易間接由馬雲揸住的21控股（01003），上周四倍升後，周五再升10.6%，睇嚟瑞東復牌就立即爆升，幾乎係毫無懸念。

講開馬雲，上周五阿里巴巴被指控涉及網上A貨問題，被多家奢侈品品牌集體興訴。同日，美國避險基金Third Point披露，於第一季沽清手上10億美元阿里股份。阿里於去年九月上市，股價曾一度炒上120美元，之後級級落，去到早前80美元附近先企定。到前星期，首季績勝預期下挾上88美元附近，但高位計仍跌了兩成六。

睇到其他好似京東股價都處高位，集體訴訟及短期對股價的不明朗因素，包括約4%股本本周禁售期完結，都預先反映咗。事實上，阿里為攬住合夥人制度，最終揀去有集體訴訟權的美國上市，正所謂食得鹹魚抵得渴，應該有晒心理準備搵定律師團迎戰打假訴訟，相信消息對阿里及系內股票，心理影響大於實際。

恩達再插輸得甘

一跌成名的恩達（01480），被證監會指股權高度集中，上周五再隊19.6%或1.49元，落到6.08元，同一個星期前高位102元相比，簡單講猶如十六碗水煲埋一碗，沿途追入真係杰撻撻。值得一提，過去二十年同類型趁貨乾被莊家放紙鳶的暴升暴跌股，話多唔多，話少亦唔少，但有一個共通點，係升之前好少人會跟，反而隊落嚟，散字派係心口掛勇，愈跌愈溝，愈溝愈揩。

手機界廣傳，慣例在六月中旬發表新iPhone的蘋果公司，可能今年會將熱賣的iPhone 6及6 plus，係咁意作硬件升級，個名後面加個「s」賣多一年。

有消息話，日本Sharp準備退出後置鏡頭市場，蘋果公司又有意將用了N年的800萬像素鏡頭，趁今次6s進行提升。股市牽起一輪蘋果公司後置鏡頭供應商的尋寶熱，早排上市的高偉電子（01415），分析員同班芬佬傳到佢好似十拿九穩，好快攞到蘋果公司鏡頭模組合約一樣。

過往經驗，新產品硬件規格推出，通常個市有理無理亂炒一通，舊年iPhone 6推出前，藍寶石屏幕生產商炒鑊勁，之後先知中空寶，高偉會唔會得到蘋果公司寵幸乃後話，此前斷估會繼續炒，上星期股價見8元後插返落10日線6.97元附近，如果企穩，發布會前不妨睇住有冇機會炒多轉。