內地減息後，周一港股衝多140點已無以為繼，連續兩日回調，尋日再跌157點，主板成交1,442億元，扣番華潤置地（01109）配股上板，成交千三億元多少少，唔見太多新資金入市蹤影。

股權追蹤

港股早兩日唔跟A股升，尋日午後卻選擇跟住A股跌，尤其期指客見無法重上27,400點，淡友稍為施壓，交易區已推至27,200點附近，最低見27,106點，日市收27,187點，成交約5萬張。短期淡友控制大局，想等機會再買的實在只能繼續忍耐，等現貨跌近四月九日上升裂口位再諗，大市會否圓頂派發完成出現急墮，指數試26,732點之後的反應十分關鍵。

昨恒指波幅指數跌穿19水平，創阿爺鼓勵公募基金入市消息後新低，整體大市縮「窩」，在大市未完成橫行消化階段，對鍾情炒輪及做期權長倉的散戶不利，昨見即月恒指27,200點認沽期權，未平倉合約升近500張或三成二，打和點要去到26,845點，貼近指數裂口位，睇落實在唔多抵賭。