Fundman睇市：光控有力升多浸

內地券商有價，光証的估值亦得以水漲船高。(資料圖片)

人行減息後市況持續反高潮，加埋一堆中字派連環吸水，恒指尋日再跌157點，收27,249點，愈來愈貼近四月初中央鼓勵國家隊來港入貨，刺激恒指大爆升後，在26,732至28,588點形成的高位長方型區間的下限。

太陽日誌

對後市，股民最好求神拜佛恒指唔好跌穿26,732點，否則代表個多月來於高位持續大成交下高追的投資者，通通變晒蟹民。個市用咗咁多年先破到兩萬五點心理關口，唔通真係去到兩萬八又被綁過？

近排深港通講到如火如荼，深成指大肆擴容，令市場聯想到通車已進入最後直路，對比滬港通，深圳地理位置上只係一河之隔，唔少深圳居民老早落香港開晒戶口，最後經深港通南來資金，會唔會又係雷聲大雨點小？可能性確實唔細。

唔信可以睇番就快半歲大的滬港通，開車前，問十個九個都話，AH股差價會因此收窄，北水會經港股通南來喪炒，向來受制於QFII配額僧多粥少，想入市又無Quota的中國股票基金會對兩市互聯通道極為雀躍。但結果點？A股較H股溢價由通車前的1.5%，擴大到現時31.6%，炒AH差價基本上在通車前經已玩完，通車後炒A唔炒H情況反而嚴重過以前。

深港通難寄厚望

通車後，滬綜指累升76%，港股升得13%，後者升幅連前者五分一都無。兩市互通窗口活躍咗，就更加講唔上，北向130億，南下105億人仔額度，開通以來爆額日數，三隻手指數晒，近期成日話滬港通配額增加，深港通殺到埋身，在下期望真係唔大。

講番個市，尋日最搶鏡要數九隻入MSCI中國指數的新貴，包括海螺創業（00586）、廣發証券（01776）、綠葉製藥（02186）及融創（01918）等，通通逼到班指數基金追貨，收市後騰訊（00700）季績，見網龍（00777）、擎天軟件（01297）等科網及軟件股被炒起，查實美國掛牌的阿里巴巴及京東（JD）上周出完季績後，網股已升過一浸，會否趁騰訊業績出埋來個反高潮，尋日至追的真係要留意。

上周人行減息後，近兩日內地券商無跟減兩融利率（孖展息），以周初兩融餘額近萬九億人仔，0.25厘等於47.5億人仔，顯然券商補充資本放借的速度，仲係及唔上一班賭仔無止境的孖展需求，趁兩融額度爭崩頭，券商都咪話唔和味。