望實A股行的港股，上周終於打破六連跌劣勢，恒指升287點收報27,577點，惟主板成交得1,319億元，再睇上海情況亦大同小異，由高峰過萬億人仔成交，上周初縮到七千零億，周五更縮到5,500億人仔，明顯在券商收緊孖展及IPO瘋狂吸水下，入市新錢唔夠。

太陽日誌

人行減息利股市

近期，中國公布的連串經濟數據，一次又一次叫分析員跌眼鏡，尤其進出口數據，出口仲未止跌唔在講，上月進口按年大跌16.1%，差不多係大行預期跌幅的一倍。不過，今日股市大媽愈見內地經濟疲弱，佢哋就愈高興，博人行繼續放大條水喉，睇上周一個月人仔拆息落到去3.21厘，較去年十二月6.13厘高位跌咗近半，中國再減息只係遲早。

周日中午，微信上廣傳人行減息半厘消息，最終證實誤傳。到傍晚時分，人行確認減息四分一厘，相信幫到大市今日早段再下一城，升多一浸。不過，要留意人行今次又再將存款息的波動區間擴闊，內地銀行不同步減存貸息留住存款的可能性好大，息差壓力的陰影底下，今日要博似乎都唔輪到內銀股。

美國掛牌的阿里巴巴首季業績好過預期，上周遭多間大行唱好，留意到績後撰寫的報告，最牛係瑞銀，睇115美元，較保守的瑞穗都改口喊買睇100美元，對比上周四抽升後收市價86美元，水位話多唔算多。然而，香港兩隻阿里系股份突然轉強，阿里健康（00241）周五升11%收報11.68元，阿里影業（01060）升3.7%報3.29元。

本文講過，史提芬曾四圍問科網股分析員，無一個夠膽話識為兩隻股票做一個合理估值，惟有用番炒賣角度去睇。自阿里健康同天貓買網上藥品平台，大爆升以來，股價在10至14.32元之間上落，走去篤篤機，期間累積加權平均成交價約11.9元，暫可視為高追者平均蟹價，升穿炒多浸出奇，但若本周又番轉頭，就唔好太大期望喇。

英國大選塵埃落定，保守黨爆冷一口氣取下過半議席，英鎊即刻上返1.55樓上，英股收復7,000點關口。保守黨執掌對英國經濟是否比較有利，暫時唔敢寫包單，但至少消除到一直預期英國大選後無黨派可以攞到過半數議席，籌組聯合政府的不明朗局面，短期勢必給予機會藉遷冊消息炒過一浸的滙控（00005）再次做好。

不明朗因素消除

好多人都唔信滙控放得下身段，出售英國零售銀行到香港遷冊，但睇番近幾年，大笨象被美、英、歐盟盯到實一實，成日搵藉口罰錢，扮吓遷冊擺一擺姿態絕不為過。況且英國銀行監管機構，逼得幾間有跨國性業務銀行相當緊，要將本地與海外業務分融，免得再嚟一次金融海嘯搞到一鑊泡要政府出錢解困。史提芬相信滙控將英國業務沽售機會唔大，但分拆減持的可能性不可抹殺。

睇遷冊消息一出的反應，估計未來一年半載與英國監管機構隔空發功鬥法，對股價好處多於壞處。股價上周中返到74.05元，幾乎補番晒73.95至76元上升裂口位後，上周五已見開車迹象，睇樣今次真係有機成為新一輪升市領頭象。

贏21%

聯康生科（00690）上周五急升一成，原來Sammi早於四月二十九日推介該股，當日股價以0.235元開出，以高低位計，累升21%。