一九九六年，時任美國聯儲局主席的格林斯潘，警告美股非理性亢奮，結果美股小休一會，最後升多四年，去到二千年科網泡沫爆破，牛市先至玩完，可見即使強如世界財金第一人，一樣可以睇錯。前晚，現任主席耶倫認為美股估值已過高，言論又引起華爾街一陣震盪。

擺脫即食麵減價戰影響後，康師傅毛利可望復甦。(資料圖片)

太陽日誌

年初至今，泛歐股市累積升幅11%，日股10.5%，對比原地踏步的道指，以及升得1%的標普五百指數，查實聯儲局的退市預期，早已教美股狂牛收斂不少。再睇埋估值，標普五百指數市盈率17.7倍，對比過去十年11.4倍至18倍的上下區間，目前美股唔算得上平，但考慮正處於歷史性低息環境，而且二千年科網泡沫爆煲前，真正非理性亢奮的美股平均PE曾經去到25倍，現時估值又唔算得上好離譜。

今日環境，耶倫依然行出來向華爾街吹淡風，的確值得股民停一停諗一諗，係咪有重大的股市危機，佢睇到，我哋睇唔到。有一點毫無疑問，係華爾街玩家同A股大媽一樣，都嫌牛市中子彈唔夠用的問題，孖展借到盡，三月最新數字NYSE的累積股票孖展借貸去到4,763億美元，是史上最高，比去年底再升4.4%。

港股全面弱勢

要知一旦利率逆轉，加埋股市調整的話，死得最慘肯定係一班孖展玩家，耶倫言論未必係想唱淡個市，但唔多唔少要為七年牛市過後，過度借貸的美股，來一次似樣的去槓桿化。

回到中國這邊，阿爺想用家長式管治A股玩家，顯然大媽唔多受，A股再插117點，收4,112點，滬綜指三日跌8%，見IPO及券商孖展數緊近期A股成交級級落，看來試一試四千點是勢在必行。港股六連跌，尋日再插350點，收27,289點，最慘烈係全日近千四隻股票向下，成個市一個「弱」字可以講晒。

而炒過一輪的內房、鐵路、內險股通通回，恒大（03333）跌8.2%，華南城（01668）跌6.4%，寶龍（01238）跌6.2%，龍湖（00960）亦跌4.9%，對比四月升幅，只能話有咁耐風流，有咁耐折墮，想買的不妨等等。前日唔知為乜抽升7.5%的蒙牛（02319），插返4.6%收41.65元，至於尋日話海螺（00914）跌穿30元要睇，昨日跌2.2%，收報30.45元，逐漸進入射程範圍。

內地即食麵減價戰，加上零售市道麻麻，康師傅（00322）一四年業績跌2%，對一隻高估值的增長股而言，殺傷力唔細，其股價由去年八月高位23.25元，一直跌到今年五月見15.96元，累跌三成一，完全享受唔到早排升市。

過往經驗，低通脹、原材料成本低企對佢有利，事實棕櫚油、麵粉及膠粒等價格都比去年同期低，加埋公司減少喺低價麵食市場泥漿摔角，增加中高價產品比例，估計今年毛利率會有改善，等就只係等top line銷售出現復甦。

基本因素不俗

早排在下曾經講過，在內地股市樓市的財富效應下，A股連白酒股營收都開始炒谷底反彈，奇怪係康師傅一類副食品股，卻係紋風不動。一五年PE啱啱唔夠20倍，以基金股康師傅而言算係平，今年業績回升機會甚高，昨日成個市散晒，但就見佢逆市做好，看來熱錢炒完一輪垃圾遇到教訓，開始跟番基本因素炒，16元樓下中短線輸面有限，可以睇實。

贏31%

Sammi於五月六日推介國農控股（01236），當日股價即抽升逾兩成，昨日更曾突破4元關口，以高位4.18元計，累升達31%。