近排魚缸個個睇實黨的指引入市，連明知吹水、成事機會微乎其微的兩桶油合併，都可以炒得一餐，牛市的盲目可見一斑，相信亦無幾多人仲留意聯儲局主席耶倫，議息後聲明有乜講。

是次銀河配股集資規模，較當年上市IPO時更大。（資料圖片）

太陽日誌

中國銀河業績預測（人民幣）

贏15%

執筆時未知議息結果，但睇見近排美國經濟數據相當麻麻，月中至今，美國新屋動工數字差過預期，三月通脹比預期低，得0.2%，四月消費者信心亦意外地回落。一連串差到極數據下，華爾街對首次加息的主流預測，已由六月推遲到九月，小弟則維持之前的大膽估計，今年美國加唔到息機會仲係高。

講番個市，四月期指、期權結算，港股無驚濤駭浪場面，惟獨見到A股收市前，五月期指失驚無神由28,347點殺到落28,132點，超過兩百點途程，最後收市抽番有凸。尋日恒指跌42點，收28,400點，主板成交縮到得1,630億元。

唔好話杞人憂天，雖然港匯仲企穩強方兌換保證價，本地銀行體系結餘維持3,106億元，同○九年歷史高位3,200億元相去不遠，反映港股市場熱錢仲係充裕，表面上睇升市是無懈可擊，不過資金市難玩正在於嚟得快去得快，搵到食留多陣，搵唔到可以即刻走。

全民睇升有隱憂

尋日沽空佔大市成交比例跌穿7%，對上一次已經係一三年十一月，可見淡友都靠邊站甚至加入好友陣營。全民看升的情緒下，結算後大市會否來一個意外驚喜，先來一個震倉？其實唔出奇，總之看官們全情投入，都要保持三分理智。

國壽（02628）首季保費收入升16.5%，但投資收益卻大升58.8%去到383.8億元（人民幣．下同），推動首季純利大升69.8%至122.7億元。受惠A股的仲有一眾內地券商，中信証券（06030）首季歸屬上市公司股東淨利潤38.17億元，按年大升191%，而海通證券（06837）首季利潤41.02億，按年大升238%，廣發（01776）首季利潤25.17億元，升204%，幾乎已經等於一四年全年業績一半。

券商股趁高伸手

內地全民皆股，A股帳戶數字終於突破2億元，兩市融資餘額也升至1.82萬億元，仲繼續創緊新高。從避險角度考量，券商一方面降低兩融折算率，即係我哋所講的孖展成數，但依然唔夠資本應付不斷開戶新客的融資需求，最直截了當的辦法，自然係趁估值高企，向街外伸手。

中國銀河（06881）以非公開方式，向不少於六間機構發行20億股H股，每股作價11.99元（港元．下同），募集資金達到239.8億，作價比周二收市價12.34元折讓2.8%。股市有陰晴圓缺，個個參與者都想盡快搵到銀，股民如是，券商都如是，搵幾個大孖沙圍晒飛的做法，肯定令到部分想同樣有機會平價加注分一杯羹的小股東心有不甘，咁做係咪公平，並不是本文想研究的重點。

今次誇張之處，在於批股規模比一三年IPO時發行的15.7億股仲要多，集資額更較當年106億元多出不止一倍，今次冚埋食，幾個單位接晒成手貨，仲要折讓咁奀，都咪話唔厲害，似乎強手是極為睇好後市，批股價11.99元，應該可以作為搭順風車短炒的參考價。