當天水圍嘉湖山莊都賣一千萬嘅時候，同為九七年蟹貨重災區嘅深井浪翠園，成交價亦直逼千萬關口。其中5期帝華軒海景戶，連車位賣970萬元，創九八年後新高，市場預期屋苑成交價快破千萬。另方面，荔枝角盈暉臺2座高層單位亦賣1,068萬元，係屋苑首見過千萬成交。

深井浪翠園樓價終於發力，其中5期帝華軒海景戶，連車位賣970萬元。（資料圖片）

二手屋苑轉旺情況

劉Sir仲記得，九七年浪翠園5期帝華軒一手曾經賣過1,300萬元，正正係樓市「大時代」。事隔十八年，近日同晉誠地產老友胡卓輝傾開，同屋苑2座高層C室，實用面積1,085方呎，連埋車位近排都賣970萬元，重見九八年後最高位，實用呎價8,940元，比○三年購入價足足升約2.6倍。

綠楊五日三度新高

佢又話，記得嗰陣時，呢類單位九八年賣二手都要成千萬元，依家同類高層放盤間間叫價過千萬，相信浪翠園好快有過千萬成交。劉Sir都記得，九七年嗰陣浪翠園10座有單位建築呎價最癲去到1.1萬元。

近排樓價升得快過九七，荃灣綠楊新邨樓價五日三破頂，代理話，屋苑A座高層4室三房戶，再賣683.8萬元創全屋苑新高。鰂魚涌太古城今個月12宗成交中有9宗係同類新高，中原莊素娟話，紫樺閣中層D室賣1,580萬元，實用呎價17,137元，創同類三房新高。

其實個市比之前旺，美聯林海成話，荔枝角美孚新邨八日有13宗買賣，係近一年未試過，四月暫錄32宗，多過三月全月22宗。同區盈暉臺2座高層D室賣1,068萬元，屋苑成交價首見過千萬，實用呎價1.4萬元新高。

中原陳凱超指，西灣河鯉景灣今個月7宗成交，多過上月全月一倍多，安曉閣低層F室賣828萬元，實用呎價約1.47萬元，貴過兩星期同類成交近9%。

尚匯 峻弦現銀主盤

新盤客撐將軍澳二手市，新都城及峻瀅連錄成交，利嘉閣劉浩勤講，新都城3期連錄3宗買賣，全部新樓回流客，3座中層B室放盤兩日即賣490萬元。

近排銀主盤多番，灣仔尚匯實用面積約368方呎單位，銀主叫價1,190萬元放盤，比兩年幾前買入價只高約100萬元，聽講原業主係內地人，最少曾承按兩次，估計個盤係首個銀主盤；牛池灣峻弦都有低層銀主盤，連車位叫價2,480萬元放盤。