尋日朝恒指高開178點後，最高曾見28,213點，諗住今次可以企穩28,000點之上，點知滙豐中國四月製造業PMI初值降至49.2，不僅較預期低，仲衰過三月，拖累大市掉頭，埋單恒指倒跌106點，收報27,827點，技術上出現穿頭破腳，睇怕恒指都要整固一下，先至有機會再次挑戰28,000點關。至於國企指數亦跌191點，收報14,478點，全日主板成交金額1,917億元。

中軟國際涉足金融IT服務領域，前景值得睇好。（資料圖片）

內地股市則強勢持續，滬綜指一度創4,444點七年高位，之後雖回軟，但全日仍力保不失，收市升16點報4,414點。

資金熱炒細價股

尋日大市早段係威好勢，有超過二百隻股票創五十二周新高，但唔少都同大市命運一樣，先升後回。睇番全日下跌股票有748隻，上升的只有710隻，好多近日熱炒的大價股都乘機抖氣，資金就繼續熱炒細價股，升幅榜上唔少都係毫子股，但往往只係純粹由資金推動，完全無章法可言，只要你心口有個「勇」字，夠膽跟分分鐘有得賺，但高回報之餘當然亦係高風險，心血少的投資者倒不如齋做觀眾算數。

個市炒到現水平，加上市場資金充裕，開始有公司趁高配股集資，同時亦有公司股東趁高減持。尋日中軟國際（00354）主要股東弘毅投資向基金悉售3.35億股，每股作價3.93元，消息拖累中軟昨日顯著下跌，一度失守3.93元，低見3.91元，但最後仍成功收於4元樓上，報4.01元。

據悉今次接貨者主要為大型保險基金、大型公募基金和全球性的資產管理公司等機構。而早前公司更與騰訊（00700）旗下的微眾銀行簽約，進入金融IT服務領域，發展前景看俏。由於大股東今次減持股份，已落入強者手中，相信整固後隨時發動新一輪升浪，建議不妨在4元附近水平買入，估計短中線有機會重上前高位4.94元，阿莊今日亦會吼位買入五萬股。

至於投資組合內的瑞年國際（02010），由於走勢仍未好轉，故昨日已按每股平均價2.57元，沽出組合內的十萬股。

東網Money18 App搶先機

另外，港股持續暢旺，各位看官如欲掌握投資先機，請即在Android的Play Store或者iOS的App Store下載東網Money18 App，隨時睇到心水股票免費報價、A股報價及AH差價等，同時亦有專家即市推介，助你縱橫股壇。