新盤賣得咁好，同區二手樓點會唔旺，好似將軍澳日出康城呢排日日有二手成交，今個月平均呎價，比上個月急升超過10%；有業主亦心雄反價，但新盤回流客一於少理照追，首都一個中層單位反價20萬元都畀呢類客以650萬元買咗。

受新盤熱銷帶動，二手市迅速轉旺。（資料圖片）

本港二手市旺概況

利嘉閣劉浩勤同劉Sir講，將軍澳新盤賣晒之後，買唔到新盤嘅回流買家，即刻逼爆同區二手市，尤其係同系嘅日出康城，今個月有成14宗買賣。

聚康呎價直撲萬元

雖然比上月同期19宗少，但平均實用呎價期內升多過10%至9,209元，近排領都3座右翼中層單位，都賣628萬元，實用呎價9,276元。

新盤賣得咁好，業主點會唔心雄，美聯馬立成話，首都6座右翼中層A室，實用面積716方呎，業主二月先以約630萬元放盤，近日反價20萬元，買唔到新盤嘅回流客，照追價到650萬元買入，實用呎價9,078元，個價又點會唔升？

其實每個區都有高價，代理話，屯門聚康山莊高層C室，賣到443萬元，實用呎價9,955元，都係同類嘅新高價。

愛蝶灣銀主搶高27%

新盤當旺，有荃灣環宇海灣入伙業主，因項目暫時未有車位出租，於是以市價月租2,800元租咗鄰近海濱花園車位。

新盤撻着二手市，拍賣場都當旺，尋日首次推出拍賣嘅筲箕灣居屋愛蝶灣8座低層J室銀主盤，由忠誠拍賣行以380萬元開價，最後以485萬元拍出，實用呎價約10,021元，搶高約27.6%，較網上銀行估值高出4%。另葵涌宏達工業中心法院令無契單位，以553萬元拍出，高開價逾10%。

市場再有新銀主盤，市場人士表示，長沙灣星匯居1座高層單位，實用面積816方呎，一○年以796萬元買入，依家已經變咗銀主盤，叫價1,129萬元放盤。

此外，中原黃良昇話，今年首季有約8,763宗二手私宅買賣登記，當中佔98.8%是帳面獲利成交，按季多0.2個百分點，連續三季創九五年第三季後有紀錄以來歷史新高，而帳面賺五成以上嘅買賣登記佔最多，達73.7%。以屋苑計，天水圍嘉湖山莊轉手獲利宗數有192宗最多。