過去的周五、六、日，內地發放的消息有點混亂，先係中證監劍指券商兩融業務之舉引來打壓大市的揣測，繼而是中證監主動澄清，之後就係人行降準，但幅度大於預期。到底在如此背景之下，昨日兩市高開定低開，都考起唔少炒家。結果恒指高開，滿以為好友避過一劫仲可以乘勝追擊，點知市況反覆，午後更一度跌六百多點。上晝被「騙」上車者，分分鐘即市就要打靶。

昨日認股證 / 牛熊證市場數據

由於即市波幅較大，昨日共有53隻牛熊證遭打靶，其中包括6隻恒指熊證及41隻恒指牛證。

過去數天內地財金部門所作出的行動，予人一個強烈的訊息，就是中央不許A股出亂子，可繼續看漲，但大前提是要「慢」，狂野的「槓桿牛」可以排除。事實上，滬綜指升到上四千點樓上，再來個瘋牛，即係叫遊戲快啲Game Over！阿爺用心良苦，投資者亦要理解。

換個角度看，既然中央力撐A股慢牛的旗幟鮮明不過，北水可以安心南來炒作估值相對吸引的港股。故有理由相信，國企指數唔會回得太多。在14,000點邊或樓下，又是留意開好倉的時候。

國指認購證中，較貼價之選有中企瑞銀購（20586），今年十二月到期，行使價14,000點，溢價9%，實際槓桿5倍。若然認為可以等低一點才入市，則可以留意中企摩通購（19203），今年十一月到期，行使價13,500點，溢價9%，實際槓桿5.9倍。