雖然人行降準幅度超預期，但A股昨日先升後回，港股午後最多曾急挫693點，低見26,959點關，收市險守27,000點關，而國企指數亦跌425點收場，報14,111點。藍籌股之中，就連堪稱「宇宙最強」的港交所（00388），股價亦一度跌逾半成。看來班中資大戶乘人心虛怯踩多腳，依尋日先升後回的市況看，相信仲未跌完，想撈貨唔爭在等多陣！

表面上政策市好似好易炒，但實際上係更加難炒，皆因冇基本因素可循。北水來無蹤去無影，港股升跌都變得無譜！針對兩地指數走勢，料滬綜指短期仍會維持在4,000至4,300點水平上落。

恒指或要回補裂口

至於港股，尋日恒指一大支陰燭插穿10日線，今轉最壞情況係要回補先前的上升裂口位底部26,200至26,300水點水平，且候恒指落到26,800點或樓下，才留意一下Shopping對象！

講開又講，尋日滬市成交破萬億元人民幣後就顯示唔到最新成交，話係技術問題，今日可復常。港交所（00388）在內地公募基金大規模南來以及深港通通車之前，亦宜率先測試好交易系統，免重蹈上交所覆轍。

個股方面，阿莊在三月初推介過蒙牛乳業（02319），話中線挑戰40元關，點知唔使一個月就實現目標，四月九日股價一度抽高至51元，尋日股價逆市靠穩，收報41.4元，升0.7%。老實講，對比起A股市場的乳業股，蒙牛現價往績市盈率才27倍，加上公司品牌及股東陣容都勝一籌，在內地投資者眼中，估值確實頗具吸引力，相信短線在40元邊會有一定承接，中長線大可繼續持貨。

此外，尋日提及過的北京汽車（01958），股價一度上過10.78元，惜遇上跌市，最終收報10.5元，無升跌，汽車股之中，呢隻係可造之材，唔好走漏眼。另一隻汽車股長城汽車（02333）公布首季業績符合預期，但仍要捱沽，收報56元，跌1.5%，初步看投行對其季度業績評價正面，且看待成正常調整，持貨者不用自亂陣腳，安心持貨。

有股友問，難得市況調整想買中資股，但又唔知從那一隻股入手。阿莊建議可考慮ETF，例如恒生H股ETF（02828），尋日跌3%，收報141.8元，落番138元樓下可以諗吓分注收集，勝在免卻選股煩惱，又能追蹤國指表現。