昨日中國公布首季GDP按年增長得7%，創下○九年以來最低增幅，股市的反應唔大，恒指期貨在數據曝光後，不足一小時之內，反而從27,583點一路挾到去27,862點全日高位，可見數據差經已在投資者預期之內。

二線內銀如交行及招行，爆發力可望較一線內銀更強。（資料圖片）

太陽日誌

贏20%
Sammi於四月一日推介華電國際（01071），當日股價低見6.48元，其後反覆做好，一度高見7.77元，升幅達兩成。

事實昨公布的規模以上工業增加值、消費品零售及固定資產投資，三個數據通通差過市場預期，在在反映中國實體經濟愈差，股市愈有炒作條件的市場共識。小弟反而驚緊，萬一短期人行有減息或者降準行動，習慣掉轉嚟炒的中港股市，反而有好消息回吐的可能。

本周初港股掂一掂兩萬八點後，一連兩日擺出一副抖氣格，有波幅無升幅，尋日大市埋單升57點，收報27,619點，升市中居然有930隻股票要跌，是上升股份的1.28倍，咁多股票插水，都怪過去幾日實在炒得太癲，當然，對比過去兩星期升浪，仲係濕濕碎。

阿里健康風險不低

三月下旬開始停牌的阿里健康（00241），復牌一次過追番晒，股價井噴式爆升八成或者5.48元，收12.26元。公司終於落實向阿里巴巴及董事的胞弟收購在線藥房交易平台，作價194.48億元，代價以合共32.74億股新股，每股作價5.28元，以及21.6億元可換股債券（涉及4.09億股，換股價5.808元）支付。

是次收購的資產，在今年三月底止年度資產淨值220萬元（人民幣．下同），交易額、未經審核收入及稅後盈利淨額，分別係47.4億、1.02億同7,088萬元。換句話，收購價相當於資產淨值7,072倍，市盈率219倍！

阿里巴巴到底係咪真係點石成金，未來可以雄霸內地線上藥品生意，可能要一段時間先見真章，但一注資入去隻殼，計埋潛在發股及可換股債券行使後的擴大股本，阿里健康總市值去到1,453億元，計晒士已經大過藍籌新貴領匯（00823）的1,086億元足足三成三，五年之後如果佢仲有咁大市值，只能讚馬雲是不世的商業奇才，不過刻下衝入去追浪，其實風險同過澳門賭番舖分別唔大。

最近老友之間爭辯得最多的話題，係今浪算唔算港股的牛三，小弟站在大好友一方，一來兩萬五點屬於海嘯後多年的重要關鍵阻力，啱啱先突破就話大市牛三，肯定係未見識過九七、二千年及○七年的升市。事實上，單由中港經濟周期仲處於低位轉捩點附近，並非牛三常見的盛極將衰，已經可以判定後市應該係有排升。況且，過往港股次次見頂，市盈率都響20倍樓上，依家只係11倍多些少，完全同牛市尾聲，拉不上關係吧！

港股牛三言之尚早

話時話，恒指、國指及A股的平均市盈率低，完全係因為中資金融股超低廉的估值造成，好似龍頭工行（01398）預期市盈率得6.4倍，同國際銀行平均的12倍幾有段距離。當然，同預期內地不良貸款周期已經見底、利率市場化、以及中央打晒開口牌要改革「暴利行業」有關。

但即使完全無增長，甚至盈利幾年間要跌一至兩成，刻下的估值尚算在合理範圍內，未來中線股市進入大時代，金融與非金融股估值之差距應有收窄空間。不過，對比之下，二線內銀像交行（03328）同招行（03968），可能更值得留意，一來流通量的考慮，爆發力較強外，亦都唔似四大行有咁多包袱，背負太多國企及地方政府融資的問題，亦可望較能享受到經濟增長回升的好處。