Fundman睇市：聯華超市追唔過

之後A股由七年高位回落，港股先肯由瘋狂的升幅中回順，收市升707點，報26,944點，成交金額再創新高，達2,915億元。國指升351點，收13,748點。而恒指波幅指數升6.66至25.39，是一三年六月以來最高，傍晚港匯觸及7.75強方兌換保證，金管局要出手干預，今次北水南炒的威力唔講得笑。

收市後史提芬致電芬佬老友，得悉傳統基金只得零星客戶趁高贖回，而有對沖基金朋友亦響應內地券商呼籲，話港股的資金盛宴只係啱啱開始，未有耐想去做淡咁話。

查實，港股單日可以狂升千七點，相當於升幅6.4%，睇落好鬼癲，好似千多隻股票幾日之間變晒博彩股咁。不過講句公道話，年初至今恒指累積升幅14.1%，連日經指數同期的14.2%升幅都比唔上，更遑論滬綜指的22.3%。

炒股要睇大媽頭

而過去五年港股亦一直大幅跑輸歐美等成熟市場，現時整體估值其實唔貴，只不過今次中央向香港股市伸出無形之手，官方喉舌加入唱好不特止，仲批埋公募基金可經港股通入市，令修正來得既快且狠。

香港投資者由以往睇實外資大行做頭，到依家要去揣摩內地大款與大媽的重口味，真係要啲時間去適應，但有一個趨勢可以肯定，就係過去兩日所見，中資股升勢不再集中於重磅中資股，買盤不少流向二、三線國企及細價股身上。

尋日經港股通錄得最多資金淨買入十隻股票，分別係中芯國際（00981）、國美（00493）、中廣核電（01816）、阿里影業（01060）、華南城（01668）、保利協鑫（03800）、中海集運（02866）、中國南車（01766）、農行（01288）及波司登（03998）。隨着深港通通車，以及監管機構放晒風，港股通的投資名單下半年可能加入中型及細價股，港股脫離半死不活的日子，變身A股化雞犬皆升，機會是不可抹殺。

銷售表現有改善

聯華超市（00980）昨日狂升44.4%，收報7.21元，公司宣布股東百青投資，向A股上市公司永輝超市（601933.SH），出售2.37億股聯華內資股份，佔已發行股本21.17%，每股作價3.92元。

內地反貪影響，過去幾年零售市道低處未算低，唔單止奢侈品消費，就連超市及便利店生意都受衝擊，聯華舊年賺得3,103萬元（人民幣．下同），按年倒退41.4%，同輝煌的一一年度年賺6.26億元比較，僅及當年百分之五。係就係去年度第四季虧損有所收窄，高管向大行放風的第一季同店銷售也開始穩定落嚟，業績好大機會最快在今年見底，但四日升咗八成二，點追？

差餉物業估價署最新數據，二月本地整體私人住宅售價指數又創新高，連升十一個月，去到291.1。二月底，港府針對「絕唔便宜」的細價樓，推出收緊按揭條款的辣招，但睇番過去幾星期的樓市成交新聞，辣招的作用猶如泥牛入海。

依家同胞們唔單止搶奶粉、搶學位，仲玩埋搶股票，相對之前盲搶，今次香港魚缸多咗新水南下，或者享受到好處的香港人會比較多，但財富效應帶動下，中短期香港樓市更加易升難跌，本地地產股好似新地（00016）、長和（00001），點都可以睇高一線，只要看官們唔嫌棄佢地升得慢。