闊別七年的大時代終於重臨！尋日恒指高開六百多點後，唔使十五分鐘升幅擴大至1,600多點，差點叩28,000點關，卜架做到手唔停。雖然唔少散戶仲係驚弓之鳥，但整體上都樂見升市，磨拳擦掌落場搏殺！阿莊深信，港股今轉大升市才剛剛開始，各位鑊鏟友好自為之！

中糧系具央企改革概念，可望吸引內地資金炒作。（資料圖片）

內地同胞來搶奶粉、日用品，港人反彈好大，但嚟搶股票，反應就正面好多，畢竟股票被搶高，估值水漲船高，資產價格升值，香港股民亦可分一杯羹。尋日港股成交又再擦新紀錄，達2,900多億元，港匯持續轉強，顯示資金繼續湧港，照計呢個時候仲係安全期，只是大市波幅擴大，風高浪急，看官幾時都要量力而為，到價止賺止蝕紀律要嚴格執行，冇得輸打贏要！

首鋼資源值得留意

上周四復活節假前交易日，阿莊推介中芯國際（00981），話北水南來，呢隻股踢上1元關唔係天方夜譚，結果話咁快尋日高位見0.98元，都算快靚正！尋日提及的中國信達（01359）一度飆上5.16元，收報4.87元，升6.5%。

另外，見近日港股通經紀牌「6999」淨買入的新寵之一有首鋼資源（00639），股價一度高見2元，收1.87元，升2.75%，成交按日翻一番至1.74億元。見其股價52周低位在1.44元，現價唔算升太多，市值差些少到百億晒士，啱內地基金胃口，可以望多兩眼。

「稀缺股」繼續旺場，尋朝恒指在高位時，貢獻最多的四隻藍籌同是未有在A股上市的騰訊（00700）、友邦（01299）、中移（00941）同港交所（00388）。

AH差價股經已炒咗一段時間，可能要抖抖氣，下一波可能由國企改革概念股接力。母公司為央企改革概念試點企業的中糧系及國藥系亦有追捧，其中中國食品（00506）再升14%，收4.8元；中糧控股（00606）升2.7%，收3.71元；國藥（01099）升3.76%，收35.9元。

中糧系孖寶礙於近年業績遜色，股價低迷，但其實公司在行業手執牛耳，中食主要做下游，唔經唔覺現價市帳率經已去番2倍；而中糧主要做上游，去年末季業績開始有改善，現價市帳率約0.7倍，若今年中績續報佳音，估值料有上調空間。至於國藥，呢兩個交易日股價都抽高咗兩成幾，但現價預測市盈率廿倍左右，都叫有數圍，短線在34至35元整固過後，仍有機會再重遊今日高位，但回吐32元水平支持未宜有失。