尋日話，長假期前，一班芬佬當美股大插插無到，必有所圖，但勢估唔到可以誇張成咁，長期門前冷清的港股通每日配額上限固然用光，尋日大市更以兩千五億的破紀錄成交金額，狂升961點，收26,237點，可見港股通只係藉口，大市升勢實質真係有相當數目的熱錢支持，港股A股化、北水南調的徵兆表露無遺。

受惠鐵礦石降價，馬鋼今年業績可望進一步改善。（資料圖片）

太陽日誌

大行預測馬鋼業績（人民幣）

睇番唔少港股通名單股，尋日開市價相當得人驚，好似啱啱推介的南車（01766），假期前收10.24元，以13.1元開出，第一口價追都要追高兩成八之多，更弔詭係尋日唔單止無見到芬佬大舉趁機食胡，早市反而愈買愈狼，最後南車以36億元成交額，貼實全日高位收14.8元。

老老實實，即使尋日開市一刻，大孖沙靜靜雞同小弟講話短炒睇16元，用三蚊（裂口開高幅度）博多三蚊，都嫌值博率同風險唔成正比，偏偏尋日湧入去掃貨的，卻是前仆後繼。

若非A股大媽或者受北京導引入市的基金唔計價的大舉南下掃貨，筆者只能解釋，尋日湧入去的買家，目標可能更為「遠大」，至少尋日以破紀錄的成交額做出升市，證明唔少睇淡或者舉棋不定的騎牆派，尋日都紛紛要貨唔要錢，加埋今次中央的無形之手出動，再睇淡或嘗試摸頂實在相當無謂。

港交所豬籠入水

尋日高盛出報告唱好港交所（00388），目標價220元，結果一步到位，講到底，港交所收入同大市成交多寡掛勾，滬港通的可投資名單今年可能加入更多股票，加埋深港通又再殺到埋身，2,500億的成交紀錄，未必唔可以短期內破完又破。事實上，尋日深滬兩市成交一樣創歷史紀錄，去到1.55萬億元人民幣，計落超過1.9萬億港元，以港股市值約等於內地兩市的66%計，尋日成交只相當於內地的13%左右。

防守股成賣剩蔗

尋日問投行老友，唔少公募基金，即使得中證監放行經港股通落嚟香港魚缸搵食，但等修改章程等手續辦妥，最快都要三、四個星期，故尋日掃到甩轆，相信大部分都係民間個體戶炒家，南下偷食掃貨。

可以想像，持續北水南炒，港股繼續A股化，港股有更高成交紀錄出現，一啲都唔出奇。睇番唔少大行，都係估緊今年港股日均成交介乎750至950億元（高盛預測係800億元），咁可以解釋，港交所點解會炒到二三線一樣。

昨日港股通名單中有十二隻下跌股份，除了之前炒到出煙的漢能（00566），超出小弟認知範圍無睇法外，超人系的長和（00001）、和黃（00013）、長建（01038）及電能（00006）都意外上榜。講到底，都係近期升得唔少，同埋業務相當防守性的股票，唔啱膽正命平炒家胃口。

其實個市升到咁，基本分析理應擺埋一邊，但太離譜的實在過唔到自己心理關口，睇落去AH差價夠闊的股份，馬鋼（00323）算比較啱心水，A股尋日收4.88元人仔，相當於6.1港元，H股只係2.98元，啱啱一個開多啲啲。

單日炒高23%仲睇佢，一來折讓咁上下的H股，大部分業績都唔多好睇，反之馬鋼去年改會計準則，攤長折舊年期後，即使話佢整色整水都好，始終有盈利增長，而去年底開始見鐵礦石價比鋼價跌得快，今年業績點都應該好過舊年。

而且市帳率計佢都仲算平，一五年得0.76倍左右，雖然要番到○七年歷史高點2.46倍恐怕機會微乎其微，但刻下中港股市有迹象行緊大牛市，番到十年平均的0.92倍，應該唔難，就算去到○八年或者○九年高位的1.7倍或者1.25倍，可能性亦唔可以完全抹殺。