港股在周一急升後，恒指昨日高開258點，但已見了全日高位，之後反覆回落，埋單只升45點。至於即月期指昨日高開後，一度突破25,000點關口，高見25,054點，但始終企唔穩喺25,000點樓上，日市收報24,949點，高水48點。

恒指期貨走勢

周一大市炒上其中一個原因，就係憧憬內地樓市政策鬆綁，結果一如所料，內地公布二套房貸首付比例降至四成，並放寬住房營業稅，但由於呢個消息市場已率先透支，不少內房股亦已偷步炒上，所以投資者相繼趁好消息出貨，大市亦衝高回落。

今日內地將公布三月份官方製造業PMI數據，或將左右大市表現。事實上，連同昨日，恒指今年已經先後三次升穿25,000點後未能企穩其上，若然今次仍未能突破，相信恒指有機會下試10日線24,512點。

恒指昨衝高後回落，收報24,900點，亦以陰燭收，技術上似乎向下調整的機會較大。始終臨近長假期，投資者入市意欲將大減，但昨日主板成交仍高達1,488億元，反映市場資金充裕，所以周一收市在24,900點沽出的期指，要視乎市場今日如何演繹內地官方製造業數據，一有唔對路就止蝕離場。