港股通通車以來靜蠅蠅，阿爺終於忍唔住出手，畀無QDII配額的大陸基金掃貨，實行北水南調，到底有幾多會真金白銀入市，大家得個估字，但消息畀機會好友在三月期指結算日去到盡，港股昨日升368點，收24,855點。

恒指期貨走勢

四月期指昨開24,700點，比上周五日市收市價高122點，之後中資、國企以慢火煎魚姿態炒上，畀空間好友逐少推進，四月期指午後見24,990點之後，結算價塵埃落定，買盤先至放軟手腳，四月期指日市收24,857點，成交6.3萬張。

以24,700點升至24,990點，共290點，調整返到24,831點，即159點，等於即市途程54%，雖然昨日主板成交達1,408億元，但以期指回調幅度，又並非強到無倫的一類，看來好友怯於美股走勢一般，且本周四之後，港股要到下周三方重啟，期間要賭埋美國三月就業數據，令到大戶好難做出太長的部署，故紛紛擺出一副有胡唔食、罪大惡極的態度。

心理上應抱破位追買的想法，但見昨日四月期指走勢，加上假期前僅三個交易日，現貨要硬闖25,000關有點難度，昨日收市前小注在24,900點沽期指，短線目標24,670至24,730點之間。