資深金融業人士林一鳴預測大市出名準確,不單其言論受市場關注,就連他近日推出的財經小說亦十分賣座。究竟這位全能博士的Quali有幾勁?今次他大方公開自己累積多年的財技與才技,教大家如何炒股、買樓、做作家!

林一鳴近日推出財經小說,希望投資者易於吸收平時難以明白的財技。

林一鳴建議投資組合

林一鳴認為,港股今年的波浪形態又亂又怪,難以再用價值投資法。

對於有市場人士預測樓市爆煲,林一鳴指未是時候。

林一鳴直言,在香港難以做作家搵食,因為收入實在太低。

炒股:數浪不合時 要緊跟國情

被譽為新派波浪大師兼中國經濟專家,林一鳴對股市的預測一向是市場焦點。不過,早前他已「自拆招牌」,認為隨着投資環境變化,運用波浪理論看大市走勢已不合時宜。他又直言,若繼續以價值投資法來投資現時港股,「一定死梗」。

他認為,現時要靠炒股發達「非常困難」,「以前投資可以睇fundumentals(基本因素),但依家步入政策市,最重要係睇消息同中央領導層嘅說話,所以事前嘅預測、分析真係完全嘥氣。我建議大家多啲接觸(了解)國情,可能更加有用。近年我投資部署都較少數浪,相比以前,依家數浪嘅準確度低咗好多。」

「快炒國策股」最Work

他表示,A股持續上漲,「托住」本來已進入熊市A浪的港股,是首次出現的情況,令今年港股波浪形態變得又亂又怪、不會如以往般明顯。「我相信呢個情況今年會持續,A、H差價會愈來愈大。最慘就係炒AH差價收窄嘅投資者,會發覺愈炒愈輸。」

要在慢熊港股中淘金,林一鳴認為最Work的策略是「快炒國策股」,即吼準內地新政策剛推出時,便買入受惠板塊或個股,再趁高獲利離場。「一年捉到幾個呢啲機會已經夠,但一定要快,最多只炒兩、三個星期。」

滬綜今年料衝四千

今年以來已有多個板塊落鑊,包括「一帶一路」概念股、新能源股、互聯網股等。他預料內地十三.五計劃將陸續出台,成為下一輪炒起國策股的黃金機會,「不過你問我四、五月有咩政策推出,真係天才都估唔到,你早人幾日估到已經好叻」。

A股在上周出現「十連升」,自去年下半年起已累積逾八成漲幅,但林一鳴重申繼續睇好A股,預期今年滬綜指可直衝4,000點。相反,港股在「升唔上又跌唔落」的格局,估計恒指全年仍會下跌5至10%,至約20,000點水平。

置業:無劈價因素 樓市難爆煲

要數林一鳴近日叫座力大增的其中一個原因,正是其對政府加辣後本港樓市的看法。二月初紀惠集團行政總裁湯文亮提出「細價樓三個月爆煲」的言論,林一鳴則唱對台,直言爆煲機會微。雖然湯文亮主動邀約林一鳴打賭樓價被婉拒,但兩人對樓市的看法不時成為城中熱話。

回想十七年前個人首次置業,林一鳴表示相對容易,除因在銀行工作可享較高的按揭成數外,亦因當時每年人工升幅達數十個百分點。「喺九十年代,我哋畢業後工作四、五年已可買樓,當時樓價低,400萬元已經買到半山1,000呎豪宅,普通物業只需百幾萬元。」

慨嘆年輕人上車難

對於年輕一輩上車困難,林一鳴表示萬分慨嘆。「我二十四、二十五年前畢業後第一份工,同依家大學生嘅人工係一樣,但樓價就升咗八倍、十倍。以前嘅年輕人對前途會有信心,知道只要努力就有出路;但依家嘅年輕人欠缺向上游嘅環境,就算幾努力,十年後都只得萬幾、兩萬蚊人工。」

兒子在十年後即將投身社會工作,是否因此倍感憂心?他直言,「老實講,就唔係太擔心,係有少少唔公平,大家都明白有一句叫『成功靠父幹』。其實盡量都唔想幫小朋友畀首期,但好客觀咁講,(要上車)真係Mission Impossible。以目前樓價嚟計,如果本身無任何資產、冇任何父母資助,畢業後十年內要買到樓非常困難。」

沙士前沽貨避一劫

在林一鳴投資物業的路上,他指自己當然有試過「蝕住走」,惟蝕幅不多於一成,最慶幸自己在○三年沙士前走得切,不至於蝕到入肉。「○一年左右,仲喺銀行做緊嘢,算係比較貼近市場,但見身邊個個都炒樓,feel到有啲唔妥,所以決定將手上所有物業賣出,幸運地避過一劫,直至○四年三月先再次入市。」

反觀今時今日本港樓市,雖然物業已達「癲價」,但說樓市「爆煲」似乎未係時候。林一鳴表示,「要樓市短期大冧,一定要有班人突然間受客觀環境影響而迫住要劈價賣樓。依家完全睇唔到呢個情況。」他重申,預計本港樓價今年升值5至10%。

寫作:寫金融小說 情節要緊湊

林一鳴入行二十多年,寫專欄和投資書或已到神級境界,但寫金融小說還是第一次。他表示,創作《財技風雲》的原意是想求變、為讀者帶來新鮮感,而更重要是讓投資者更易吸收,「因為孖展、配股、供股等財技,一般散戶較難明白。」

要成功捉住讀者的心,緊湊的情節是關鍵,而這也是最考功力的一環。他稱,「要將幾十樣財技知識串埋喺同一個故仔,又要情節通順,真係好高難度!」

融合自己多年見聞

另一邊廂,有網民開始猜測內容的真確程度,有人更指「有番咁上下功力的人,都知故事在影射邊間公司、邊個人。」他則強調,書內人物、情節全屬虛構,只是融合了自己多年來累積的經驗和所見所聞。

眾所周知,林一鳴熱愛跑步,就連今次小說內容逾半都是在跑步時構思的。不過,每日工作朝八晚八,放工後又要陪伴家人,每晚竟然還有時間寫作?「冇辦法,惟有迫自己寫快啲、瞓少啲,有時出trip都會寫。」他認為,要做作家,就要不停寫,「寫得唔好唔緊要,因為寫作好似做運動咁,會愈寫愈好。」

回報雖小 滿足感大

他稱:「對於我嚟講,炒股、買樓只係交易,係生活嘅一部分,好難變成興趣。做作家雖然金錢回報小,但帶來嘅滿足感最大,係錢買唔到嘅。」既然這位「文青」愛字如命,大可直接做全職作家。他則笑言,「喺香港,單靠做作家搵食都幾慘。二、三十年前、倪匡嘅年代都仲可以靠寫作生存,但依家只有一至兩成嘅書可以賣多過一千本。假設個作家好叻,分到逾10%版稅,其實收入只得萬幾蚊。計番寫作時間,應該少過最低工資。」

林一鳴的新書在面世不足兩個月已售出約5,000本,銷情超出預期,與他在金融界的成就不無關係。