前晚道指因為經濟數據差勁，隊低292點，收17,718點，但下周一期指結算的港股，卻是一副應跌唔跌的姿態，昨日早市最多跌129點，相對美股跌幅溫和得，中段多得A股拗腰倒升，恒指曾經倒升64點，尾段反覆，收市跌31點，報24,497點，睇嚟結算前，港股仲未想咁快結束上落市。A升H跌底下，AH溢價指數升到135.72，再創今浪新高，反映兩地同時掛牌的股份，A股比H股平均高出三成五。

標緻雪鐵龍能否盡快扭虧為盈，是東風業績關鍵所在。（資料圖片）

太陽日誌

今浪中國大媽對中央的穩增長措施顯得信心十足，真金白銀兼借大孖展入市，反而八成交投來自機構投資者的港股，依然紋風未動，事關普遍賓架預估，中國GDP要到年中等減息效果浮現之後，增長的拐點先至會出現。

近期滬港通北向額度門前冷清，可見佢地對跟大媽去衝浪興趣唔大，兩市本身又做唔到套戥，玩家心態南轅北轍，等兩市差價收窄，可能要一段日子，一係A股炒家對經濟失望，又或者錢多貨少的基金佬，終於忍唔住補倉至得。

航運股未見起色

今年中國的GDP增長目標訂得7%，乃九十年代以來最低，外圍疲弱加上內部經濟改革，今日基金要搵有故事支持的中資股，難度好高，但凡沾唔上「互聯通+」或者「一帶一路」概念的，其實唔少估值仲殘過○八年海嘯時。舉個例，航運股中海發展（01138）市帳率0.68倍，仲低過海嘯時期的0.75倍，即使國企股，平均市帳率1.28倍，比○八年海嘯低位1.1倍亦唔高得幾多。

近期唔少人搵「互聯網+」故事去炒，結果一眾軟件及手遊股輪流被炒起。早排介紹的IGG（08002）早兩日輾轉見4.43元，走勢唔錯。尋日見博雅（00434）幾對辦，升6.9%，收6.19元。

博雅有短炒條件

博雅主攻棋牌類遊戲，產品周期較長，去年由網上加快移值至手機見成效，手機遊戲收入支持整體收入及純利升38.8%及1.1倍，至9.45億及2.8億元人民幣，16種舊有遊戲外，今年有5種啤牌新遊戲推出。

博雅一五年預期市盈率啱啱低於10倍，返到舊年30倍的瘋狂估值水平，機會應該極微，但以一五年預測32%的盈利增長，再睇佢尋日大成交，作勢想挑戰月初高位6.5元（收市價計6.19元經已破咗位），應有短炒一浸的條件。

東風（00489）出成績表，去年純利128.45億元人民幣，按年升22%，符合大行預測中位數，昨股價升3%，收報12.16元。

去年東風累計銷售汽車273.35萬輛，按年升6.4%，乘用車及商用車分別升10.4%及下跌12.2%，今年銷售目標295萬至300萬輛，按年升8至9.6%。雖然同一三年的19%銷售增長比較，不可同日而語，但如果達標，至少銷售增長會較一四年有所改善。業績另一關鍵，是入股法國標緻雪鐵龍的戰略聯盟，能否盡快扭虧為盈。

東風一五年PE得6.3倍，比十年平均的9.7倍及中位數的8.7倍，分別低35%及27.5%，12元左右應有充足safety margin，可放心揸實。睇番一一年以來，東風高位往往可以去到8.5至9.5倍區間，博市況未來好轉，又唔怕悶的，可以留意吓佢。