舊年一手住宅新盤熱賣，令一眾地產代理行亦賺大錢。昨日兩間本地龍頭代理行中原集團同美聯集團（01200）齊齊派業績，兩間代理行公布純利分別錄得8.43億同6,397.5萬元，其中美聯更加係轉虧為盈。另外劉Sir仲知道進軍香港嘅Q房網，已經積極同發展商聯絡，暫時已經有四個新盤委託咗佢哋幫手賣樓。

Q房網陳坤興（右二）料，兩年後公司分店增至200間。右一為英皇國際執行董事張炳強。

美聯集團黃建業（右）稱，集團會做好自己。左為黃靜怡。

本港部分地產代理最新動向

劉Sir睇見中原集團份業績，原來舊年佢哋促成交易金額超過8,100億元，全年佣金收入達148億元，按年增長一成，純利8.43億元，創歷來新高，去年促成宗數超過45萬宗，而佢哋香港住宅部舊年佣金收入達28.8億元，亦創下歷史新高，按年增長42%，純利3.95億元。

而美聯集團公布，舊年收益錄得約41.2億元，按年升約23%，創九五年以來新高，純利錄得約6,397.5萬元，轉虧為盈，而一三年度就虧損約2.04億元。

黃建業料商廈價升10%

集團副主席兼董事總經理黃靜怡話，今次轉虧為盈，主要因集團已經強化係香港嘅市場地位，加上舊年一手住宅銷售交易有增長。她亦話，舊年一手代理銷售生意增加，佣金回贈亦增加約五成。去年該行回贈金額高逾7.36億元。

對於業界有新行家加入，以高過市場佣金分成比例吸引業內代理加盟，美聯集團主席黃建業就話，代理行業就如同酒樓一樣，「單靠樓面做唔哂，都要靠埋廚房等其他部分」，佢又話「疾風知勁草，板蕩識忠臣」。佢今年就最睇好寫字樓市況，料租售價均可上升10%；而中小型住宅樓價將會平穩。

曾為美聯舊部嘅Q房網董事總經理陳坤興話，Q房網最近就獲英皇國際（00163）委託銷售三個港島新盤的單位，包括西營盤維港峰等，涉及39伙。而佢地已經租咗20多間舖，員工就有約200至300人，佢哋最近亦獲得嘉華國際（00173）將軍澳嘉悅嘅銷售委託。

地監新指引籲前線守法

另地產代理監管局為改善前線代理守法循規情況，噚日發出最新執業通告，提醒持牌人有責任管理業務以確保僱員遵守地產代理條例，必須對員工施行有效既管治措施，並提供培訓及監察，亦應制訂一套制裁措施，預防及制止員工違規或不當行為，新執業通告將會係今年九月生效。