香港車位價錢可以話有升無跌，最近更加接連有創高價個案出現。好似舊年開始不時出現車位破頂價嘅青衣區，啱啱又刷新紀錄。區內盈翠半島有個雙號車位以178萬元賣出，創咗全區新高，比一月份灝景灣所創出嘅舊紀錄輕微多咗1.8萬元。另外，有投資者見車位租金都唔錯，以198萬元創屋苑新高價買入北角和富中心車位收租。

青衣車位售價頻錄新高，最新紀錄由盈翠半島一雙號車位創出。（資料圖片）

二手車位及住宅高價成交

車位市場月月有新高，美聯樊志聰同劉Sir講，啱啱賣出嘅盈翠半島雙號車位，成交價178萬元，創咗全區車位售價新高。據聞，原業主揸咗個車位約十五年，依家升值約133萬元或近三倍。

而青衣區對上紀錄係一月份錄到嘅灝景灣車位成交，當時成交價176.2萬元，即係今次紀錄再高1%。同區樓價都升唔停，好似青怡花園7座高層C室，實用面積約547方呎，屬三房戶，最近以約610萬元創屋新高價賣出，實用呎價約11,152元，約二十九年升值逾13倍。同屋苑有車位上個月成交價去到95萬元，相信係屋苑新高。

和富料回報兩厘七

北角區最近都頻頻錄到車位高價成交，世紀21日昇黃文龍稱，有投資者以198萬元買和富中心單號車位，創屋苑車位價新高，估計租金回報率有約達2.7厘。

而香港置業林文奇話，資深投資者黎汝遠見近期車位價錢唔錯，剛以220萬元賣出北角城市花園L3層單號車位，約四年多帳面賺約122萬元。個成交價料創新高。

除咗車位之外，部分屋苑呢幾日繼續有高價出現。紅磡黃埔花園兩房戶售價終於升穿六球。

黃埔減價盤照破頂

聽市場講，該屋苑2期9座中高層E室，實用面積389方呎，雖然減咗約22萬元，以608萬元賣出，但個價仍然創咗同類新高，實用呎價去到約15,630元。

鰂魚涌惠安苑E座高層戶售咗1,090萬元，實用呎價約12,854元。名采策略稱，有買家以600萬元買入北角友福園有個低層特色戶，實用呎價16,854元。

此外，祥益稱，屯門居屋兆康苑F座高層6室，售450萬元創屋苑新高，實用呎價約7,923元。消息指鑽石山夾屋悅庭軒有個極低層三房單位，以656萬元高價賣出。